Kunngissap inuuissiornera eqqaamasanik qaffakaatitsivoq

Kunngissaq Frederik ullumi 50-inik ukioqalerpoq. Danmarkimilu sumiiffinni arlalinni malunnartinneqarpoq. Pisullu KNR tv-kkut DR-ikkullu malinnaavigineqarsinnaallutik.

Nunatsinni pisumut isiginnaarutikkut malinnaasoqarpoq, taakkualu ilagaat 70-inik ukiulik Ussarqak Qujaukitsoq. Taassuma kunngissaq inuusukkallarneraniilli ilisarisimalersimavaa.

- Kammaga 50-iliisoq una fjernsynikkut aallakaatitaat nooqattaarlugu, KNR-imut DR-imullu isiginnaarujoorpara, Qaanaarmiu Ussarqak Qujaukitsoq oqarpoq.

Taassuma kunngissaq New Yorkimi naalagaaffiit peqatigiit ataatsimeersuartitsinerani 1994-mi naapeqqaarpaa. Kunngissallu Qaanaamit Daneborgimut qaammatini sisamani qimusserluni ilisimasassarsiornerani aatsaat ilisarisimallualerlugu.

"Qanoq iliussavakka?"

Angalanermilu tassani pisoq aalajangersimasoq eqqaamalluarpaa.

- Tupeqarami immikkut, iserlunilu aaqqataarniarsarigami assut naalliuppasilluni. Taava aaqqatini peeriarlugit aperivoq "Ussarqak ukua qanoq iliussavakka?"

Kunngissaq sunaaffa assamigut uusimasoq, iga kissarpallaartoq tigusimagunarlugu. Uuneri imertanissimammata Ussarqap qaarariarlugit ulluni marlunni assani sissueqqinnaassagai oqarfigaa.

Kunngissap ilisimasassarsiorluni angalareerluni Qaanaamut uterami kammattaani ilassiutigalugu qujaffigisimavaa. Nuannaarluni assani takutissimallugit.

- Kunngissap eqerujorujussuarlunga ilassilluni, assani takutillugit oqarpoq "ajoquteqanngillat", nuannaartorujorujorujussuulluni, Ussarqak Qujaukitsoq eqqaamasalikkersaarluni oqaluttuarpoq, kunngikkormiullu tamaasa pilluaqqullugit.