Uummannarmiunut nutaarsiassatsialak: Imeq imeqarfimmeersoq imerneqarsinnaalerpoq
Imeq Uummannap imeqarfianeersoq imerneqarsinnaaqqilerpoq. Nukissiorfiit pingasunngornermi ullup qeqqata siorna taama nalunaarput.
Tassalu imeq imeqarfimmeersoq nakkutilliisut atorneqarsinaasutut akuerivaat. Uummannarmiullu uummannameersumik imissaqalerput.
Kisianni Erngup aqqutai - ruujorit - imermik nakkutilliisunit suli akuerineqanngitsut, Nukissiorfiit erseqqisaatigaat. Tasssalu imeq suli najugaqarfinniittoq imeqqusaanngilaq, errorsissutaassanngilaq uffarfigineqassananilu.
AAMMA ATUARUK Nukissiorfiit Uummannaq: Klorimik kuisiniarluni uuliamik kuisisoortoq
- Erngup aqqutai imerneqarsinnaasunngortitsinermut ilaanngillat, taamaattumillu erngup atorneqarnissaanik killilersuinerit allanngortinneqarnatik, Nukissiorfiit tusagassiuutinut nalunaarumminnit taama allapput.
- Septembarip 20-at: Uummannami imeq uuliamik mingutsinneqarsimasoq innuttaasut ilisimatinneqarput. Tamanna septembarip 11-anni pisimasoq, tassanilu Nukissiorfinni sulisup klori akuutissaq atornagu uulia akuleruttoorsimavaa.
- Innuttaasup piffissami tassani pasitsaassaqalerput, imermi uuliarsunnittoq naamaneqarsinnaammat.
- Nukissiorfinni sulisut imermut klorimik kuisigaangamik kiinarpaqartarput, taamaammat sulisup uulia kuigamiuk naamasinnaasimanagu, Nukissiorfiit ilisimatitsipput. Uulia klorilu assigiillutik akimut ersittumik qalipaateqarput.
- Uummannami aalisakkeriviit septembarip 19-iannili matoqqatinneqalerput.
- Meeqqat atuarfiat meeqqeriviillu aamma matoqqatinneqarnikuupput, maannali ammaqqinneqarsimallutik.
- Imeq minguitsoq imertartarfinnut pisillugu Uummannamut assartartorneqartarpoq, taamaalilluni innuttaasut namminneq imertartarlutik. Umiarsualivimmit nilaat aamma agguaanneqartarput.
- Imeqarfimmi imeq minguitsunngorsimasoq septembarip 29-anni nalunaarutigineqarpoq. Imeqarfimmiilli erngup akuerineqarnera Nukissiorfinnit aqaguani uterteqqinneqartariaqarluni.
- Imeq qaqugu imerneqaqqissinnaalissanersoq Nukissiorfinnit suli oqaatigineqarsinnaanngilaq.
Najugaqarfiit, suliffeqarfiit tunisassiorfiillu imermut tankiisa salinnissaat Nukissiorfiit tullinnguuppaat. Taakkumi suli uuliamik akoqarsinnaapput, salilluarneqaqqaartinnagillu suli atorneqarsinnaanatik.
Nukissiorfinni sulisup imeq klorimik akuniarlugu kukkulluni uuliamik akusimagaa septembarip 20-ani paasineqarpoq. Paasineqareerneranit Uummannarmiut Ikerasammit RAL-illu umiarsuaanit Aasiannit imermik imerneqarsinnaasumik pajuttorneqalerlutik.
Imeq uuliamik akoqarunnaartoq Nukissiorfiit siornatigut nalunaarutigereeraluarnikuuaat, tassani imermik misiliutit ulluni marlunni tulleriinni uuliamik takussutissaqannginnera aallaavigineqarluni. Nalunaarutigineranit aqaguttoq imeq uuliamik suli akoqartoq paasineqarmat erngup imerneqaqqissinnaaqqilerneranut nalunaaruteqarneq Nukissiorfinnit utertinneqarpoq.
Erngup uuliamik akoqarunnaarsimanera qulakkeerniarlugu imermik ulluni arfineq-marlunni misilittaanerit aallaavigineqarput.
AAMMA ATUARUK SIP Uummannaq: Sulisut aningaasarsiassaralui matussusersigit
