Uummannaq: Suliffeerunnermut tapinik kina pisinnaava?

Uummannami erngup uuliamik mingutsinneqarnerata kingorna sulisorpassuit suliartorsinnaajunnaarlutik angerlartinneqarput.

Aningaasarsiatik annaagaluarlugit suliartorsinnaajunaarnermut ikiorsiissutinik kommunimit taperneqarnissartik periarfissaraat.

Suliffeqarnermut naalakkersuisup Erik Jensenip kikkut ikiorserneqarsinnaanersut maanna qulaarpaa:

- Akunnermusiallit, fabrikkimi sulisut tassani eqqorneqarsimasut suliffeerunnermut ikiorsiissutinik pisinnaaniassammata Majoriamut saaffiginninnissaannik kaammattorpagut, Erik Jensen oqarpoq, meeqqerivinni pisortalluunniit suliffeqarfiutaanni sulisut akunnermut aningaasarsiallit ikiorserneqarnissartik periarfissarigaat erseqqissarlugu.

AAMMA ATUARUK SIP Uummannaq: Nukissiorfiit må dække den mistede løn

90 procentit tunniunneqartarput

Sapaatit akunneri kingumut 13-it akunnerni 182-ini sulisimaguit suliffeerunnermut tapinik ikiorserneqarnissaq periarfissaavoq, taamaakkaluartorli:

- Majoriamut saaffiginnikkunik naatsorsuussiffigineqartarput, aningaasarsiarisimasallu 90 procentia suliffeerunnermi ikiorsiissutitut tapiissutigineqartarluni, Erik Jensen oqarpoq.

Tassalu assersuutigalugu Royal Greenlandimi sapaatit akunneri marluk piffissaq tamaat sulisimaguit suli akileraartinnak 7845 koruunit 60 oorillu akissarsiarissavatit.

Taava Uummannamisut suliartorsinnaajunaaruit, pisortaniillu ikiorserneqassaguit, sapaatit akunneri marlunni suli akileraartinnak 7061 koruuninik 4 oorinillu aningasarsissaatit, tassa 90 procentit aningaasarsiarissallugit.

AAMMA ATUARUK Nukissiorfiit Uummannaq: Klorimik kuisiniarluni uuliamik kuisisoortoq

Uummannami sulisut angerlartinneqartut namminneq pisuussutiginngilaat. Pissusissamisuunngila taakku 100 procentimik aningaasarsitinnissaat?

- Soorunami taanna assigiinngitsutigut isummersorfigineqarsinnaavoq aamma paasilluarsinnaavara apeqqut. Kisianni tassa inatsisit malillugit sulisussaagatta  inatsisillu malillugit 90 procentimik allaqqalluni taanna aallaavigalugu paasissutissat assigiinngitsut ikiorsiissutillu tikkuussivigaagut.

SIK suleqatigalugu misissuipput

Sulinikkut isertitaqannginnermi aningaasarsiassaraluanut taartaasunik ikiorsiissutit, tamakkiisumik sulinermut naapertuuttuunngortinneqarsinnaanersut Sulinermik Inuussutissarsiuteqartut Kattuffiat suleqatigalugu misissoritsik taassuma oqaatigaa:

- 90 procentit missaanni maanna pissarsisinnaapput, taannalu 100 procentinngussappat inatsit suna toqqammavigissavarput ilaalu ilanngullugit. Inatsisitigut qulaajaanerit massakkut ingerlaqqaartariaqaramik, neriorsuinerit allallu pinaveersaartariaqaratsigit. Kisianni periarfissat suusinnaanerinik oqaloqatigiinnerit ingerlattariaqaratsigit.

Suliffeerunnermut ikiorsiissutit kingumoortumik ullut 14-ikkaarlugit akiliutigineqartarput.