Uummannaq: Imeq avataaneersoq mingoqarsimasoq
Susanne Qvist Nielsenip tankersuarnut imertariartilluni imeq kajorujuttuinnaasoq ippassaani naammattoorpaa:
- Ilua sorujuinnaasoq, qaqortukujussuit kajortullu allanngillat aalasut. Soorlu taamatut saniit angalarlutik tamaani.
Susanne Qvist Nielsenip Nukissiorfiit ornillugit imeq tankersuarneersoq takutikkiartorlugu ippassaq ullaagaa tunniukkiartorpaa, Nukissiorfimmiilli kaffefilterimut saliinnaqquneqarpoq:
- Kaffefilterimut kueriarlugu atorsinnaagipput, kisianni, ila - una taamaak saneqartigisoq errorsivigissalluguluunniit nakernanngilaq.
Nukissiorfiit imermik avataaniit pisariaqartitsiunnaarlutik ullaaq manna nalunaarutigaat. Taamaakkaluartoq Ikerasammi slangi imertarnermut atorneqartoq aalisakkeriviup niooqqaavianiittoq imermik pilersuinerup naammattoorneqarpoq:
AAMMA ATUARUK Godt nyt til Uummannaq-borgerne: Vandet fra vandværket kan drikkes igen
- Talittarfiup qaaniippoq. Aalisakkanik niooqqaavimmi - qaaginnaaniippoq. Isumaqarpunga slangi taamaattoq, taamatut inunnut imertartuutigissallugu tulluanngittoq, Jens Mathiassen oqarpoq.
Tassa Uummannami tankersuit assigiinngitsuni innuttaasut assigiinngitsunik misigisaqarfigaat. Susanne Qvist Nielsenilu Nukissiorfiit ippassaq akissutaat naammaginngilluinnarpaa:
- Kusanalaarpoq taamatut atugaqarluni imatullu akineqarluni kaffefilterimut kuuteriarlugu imissatut atorsinnaavasi, taannartaa akissutaa tigusinnaanngilara.
Erngup mingutsinneqarsimanerani imeritinneqartut kajorujullutillu mingunnerat Nukissiorfiit ilungersunartutut isigaat.
- Innuttaasuniit paasitinneqarpugut imertartarfimmi mingoqarsimasoq, tamanna ilungersunartutut isigaarput. Paasiniarlerparpullu susoqarpiarsimanersoq. Ajunngitsortaalu tassaavoq Ikerasanniit imermik pilersuisariaarukkatta. Kisianni soorunami ilungersunartutut isigaarput, tassami arlaatigut Ikerasanni imeq ajorsimassappat innuttaasut illersortariaqaratsigit, Nukissiorfimmi pisortaagallartoq, Claus Andersen-Aagaard oqarpoq.
AAMMA ATUARUK Nukissiorfiit pisortaanerat ingerlaannartumik pisortaajunnaartoq
Innuttaasut kuuinnartumik imillit qaqugu naliginnarmik angerlarsimaffimminni imermik atuisinnaalernissaat nalunarpoq. Nukissiorfiit maanna erngup aqqutai salikkaat Nukissiorfiullu nittartagaani erngumut uuliaqassusermut misileraanerit takuneqarsinnaasut erseqqissaatigaat.
