Uummannaq ikiuiniarluni sukkanerpaamik iliuuseqartoq

- Siusinnerusukkut taamatut pisoqarsimaneranik nalaataqarnikuunnginnatta soorunalimi siullermik tupassimagaluarpunga, eqqarsarlunga qanoq iliorniartugununa? Kisianni suleqatigiilluarnitsigut ataqatigiissaarilluarnitsigullu ullumikkumut iluatsilluartutuut taasinnaavarput, Qaasuitsup Kommuniata Uummannami aqutsisoqarfiani pisortaq, Makkak Markussen, oqarpoq.

Uummannamut qimagutitinneqartut atuartut angerlarsimaffiannut timersortarfimmullu inissinneqarallarput.
Aalisarnermut piniarnermullu ilinniarfiup ineqarfii aqqaneq marluk kommunimit aamma pisatsersorneqarput nutserfigineqalereersimallutillu: 

- Atuartut angerlarsimaffiannut inissitsiterneqarsimasut ulluinnarni inuunissaat eqqarsaatigalugu ilaqutariiaakkaarlutik ataatsimut ineqarniassammata.

Nunaqarfimmiut qimagutitinneqarsimasut nerisaqarnerat kommunimit isumagineqarpoq. Taassuma saniatigut illut arfinillit missaanniittut tullinnguullugit aamma piareersarneqassapput. 

- Illunik inoqanngitsunik pisariaqartitsigatta taakku tullinnguuttussaavagut. Kikkut suullu taakkununnga inissinneqassanersut aaqqissuunneqarumaarpoq, Makkak Markussen oqarpoq.

Illunilu taakkunani najugaqarallartussat amigaateqassanngillat. Nuna tamakkerlugu katersuiniarnermi pequtit atortullu assigiinngitsut tunniunneqarsimasut aamma kommunip Pilersuisumi pisiai iserterfiusussani piareerneqassapput.

- Sinerissaminngaanniillu pequtit katersorneqartut atorlugit pisatserneqartussaassapput.

Nunaqarfimmiullu nunaqarfigisaminnut utersinnaanissaat suli nalunarpoq.

- Illoqarfimmiikkusunnersut imaluunniit Uummannap eqqaani nunaqarfinnut nuukkusunnersut taamaassanngippallu qanoq eqqarsaateqarnersut aperineqassapput. Imaassinnaavorlu illoqarfiit allat sillimaffigineqassasut. Kisianni Nuugaatsiarmiut isumaat tassani salliutippavut, Makkak Markussen oqarpoq.