Uummannami qimussimik namminneq sukkaniuutsitsilersut
Avannaata Qimussersua ukioq manna pilersaarutit malillugit Uummannamiittussaagaluarpoq.
Upernaaq mannali silarluttarnerata issaasannerujussuatalu siku qimussimik sukkaniuuffiusussaagaluartoq qajannarsisippaa.
Taamaattumik Kalaallit Nunaanni Qimussertartut Kattuffianni ilaasortat marsip aallartisimalernerani ataatsimiipallannerminni Aavannaata Qimussersuaqarnissaa Sisimiunut nuunneqassasoq aalajangerpaat.
Taamaakkaluartorli Uummannami qimussimik sukkaniuutsitsisoqassaaq.
Uummannamimi qimussertartut peqatigiiffiat Qimusseq 85 qimussimik nammineq apriilip arfineq-pingajuanni sukkaniuutsitsisussanngorpoq.
- Avannaata Qimussersuaqarnissaanut, Uummannarmiut, Uummannap sulluarmiullu qilanaartorpassuunikuupput. Soorunami nuunneqarneranut pakatsisorpassuunikuullutik, taava tassunga taarsiullugu pisoqanngitsuuinnissaa pinngitsoorniarlugu taamatut aaqqiilluta, qimussertartut peqatigiiffianni siulittaasoq Thomas Zeeb oqarpoq.
KNQK-p Avannaata Qimussersuata nuunneqarnissaanik aalajangerneranut pissutaavoq Uummannap kujataatungaani kangiatungaanilu sikkorlummat, taamaattumillu illoqarfiup kujataatungaaniit sikumukartoqarsinnaanani.
Thomas Zeebili naapertorlugu Uummannami qimussimik sukkaniuutsitsinissami aqqutissaq allanngortilaaginnaraanni aaqqissuisoqarsinnaavoq.
Illoqarfiummi kangiatungaagut aqqarluni sikukkut qimussertoqarsinnaavoq aamma kujasinnerulaakkut ingerlasinnaagaanni aqqutissaareersoq qimusserfigineqarsinnaalluni.
Avannaata Qimussersuanut unammillernerunngitsoq
Uummannami qimussimik sukkaniuutsitsinissaq Avannaata Qimussersuanut unammillernerunngitsoq Thomas Zeebip erseqqissaatigaa.
- Naamik, Avannaata Qimussersuanut unammillernertut isigisassaanngilaq. Avannaata Qimussersua ataqqilluinnarlugu ullua eqqornaveersaarnikuuarput, taanna KNR-imut oqarpoq.
Avannaata Qimussersuata 35-ssaannik aaqqissuunneqarnissaanut Uummannami innuttaasut qilanaarnerigaluat pakatsininngorpoq, taamaattumik qimussertartut peqatigiiffiat Uummannami sukkaniuutsitsissapput.
Uummannamilu sukkaniuutsitsinissaq soqutigineqarlualereerpoq.
- Apuuteqqaartunut tallimanut siullernut akissarsiarititassat amerlanerat pissutigigunarlugu soqutiginnittoqarluarpoq, Thomas Zeeb oqarpoq.
Tassami ajugaasoq 35.000 koruuninik akissarsiassaqarpoq, aappaattut apuuttoq 25.000 koruuninik aamma pingajuattut apuuttoq 20.000 koruuninik akissarsiassaqarput.
