Avannaata Qimussersua Sisimiuni pisussanngorpoq

Maanna qularnaatsumik inissippoq Avannaata Qimussersua arfininngorneq apriilip aallaqqaataani Sisimiuni pissasoq.

Kalaallit Nunaanni Qimussersartut Kattuffiat KNQK sisamanngornermi ualisoq taama nalunaarpoq sivisuumik unnuartalerlugu ataatsimeereerlutik kiisalu taasineq sisamanngornermi naammassereersoq.

- Uummannami, Ilulissani, Sisimiunilu ilaasortavut tusarniaqqaarpavut sunik neqeroorsinnaanersut maannalu taasisoqareernerani Sisimiut toqqarlugit, KNQK-mi siulittaasoq Mikkel Jeremiassen KNR-mut oqarpoq.

Avannaata Qimussersua Uummannami pisussaagaluarpoq. Piffissamili kingullermi silarluttarnerani issaasanneranilu sukkaniuffissaagaluaq sikueruppoq.

KNQKp Ilulissat aamma Sisimiut tusarniaaffigai aaqqissuisuuneq tigusinnaanerat tamannalu pingasunngornermi naammassivoq.

Aningaasaqarneq patajaatsoq

Tamatuma kingorna sivisoqisumik ataatsimiittoqarpoq tamannalu taasinermik sisamanngornermi naammassisumik naggaserneqarpoq.

- Sisimiormiut Uummannami taamaatitsisoqassappat aaqqissuisuusinnaasutut inissisimanertik tunngavigalugu piareersarluarsimapput aammalu aningaasaqarniarnikkut patajaatsumik inissisimallutik. Taamaattumik Sisimiut toqqarneqarnerat toqqissisimanarpoq, Mikkel Jeremiassen oqarpoq.

Sisimiuni anngunniuyttoqareerpoq sapaatip akunneranilu tulliuttumik sumiiffinni allani anngunniunnerit pisussaallutik.

Suliassaq annertooq tulleq tassaalerpoq qimmerpassuit inuttaasalu Sisimiunut assartornissaat.

- Sisimiut Kangaatsiallu akornat pisarnermit sikuunnginneruvoq. Allaammi umiatsiaaqqat ippassaq pingasunngornermi ajornaquteqanngitsumik Kangaatsiap eqqaani Ikerasaarsummiit Sisimiuliarsimallutik, Mikkel Jeremiassen oqarpoq.

- Qeqertarsuup tunuaniit assartuinissat pillugit oqaloqatigiinnerit aallartereerput angallatit marluk assartuisinnaanerat misissorneqarluni. Tamanna sillimaniarneq eqqarsaatigalugu toqqissisimanarneruvoq. Aamma angallammut utikaajaarnannginnerussaaq, Mikkel Jeremiassen oqarpoq.

Ilimagineqarpoq qimussit 40-ut missaaniittut inersimasuni sukkaniuteqataassasut kiisalu Avannaata Qimussersuaaraani qulit 20-llu akornanniittut peqataassasut.

Avannaata Qimussersua toqqaannartumik KNR-TV-mi aallakaatinneqassaaq.