Avannaata Qimussersua nuunneqassagunartoq
Nalliuttorsiorpalaartumik Avannaata Qimussersuata apriilip aallaqqaataani Uummannami pinissaa pilersaarutaagaluarpoq.
Tassami ukiut 35-it matuma siorna Avannaata Qimussersua siullerpaamik Uummannami pivoq tamannalu pissutigalugu Uummannap sulluaniit meeqqat inersimasullu peqataasussat pisarnermit amerlanerusussaagaluarput.
Maannali ilimanarluarpoq sukkaniuttarnerup pingaartinneqaqisup Ilulissanut Sisimiunulluunniit nuunneqarnissaa.
Imartamili sukkaniuffissaagaluartumi umiatsiaaqqat sisamanngornermi angallapput tamaani siku ullut kingulliit nallorluni saavereersoq.
- Ilulissani Sisimiunilu ilaasortatsinnut allappugut paasiniarlugu inersimasut meeqqallu Avannaata Qimussersuani sukkaniunnissaanni aaqqissuisuussagunik sunik neqerooruteqarsinnaanersut, Kalaallit Nunaanni Qimussertartut Kattuffianni KNQK-mi siulittaasoq Mikkel Jeremiassen KNR-mut oqarpoq.
Inissat ilavaat
Aaqqisuisussatut piareersimasuni Sisimiut siullertut taaneqarnikuugaluarput.
- Assartuinikkulli unammilligassat arlaqartut aaqqiissutissaannik nassaarniaqqaartariaqarpugut. Taamaattumik Air Greenland aamma angalatip Gustaf Daleenip siorna peqataasunik Qasigiannguanut assartuisup piginnittua attaveqarfigineqarput, Mikkel Jeremiassen oqarpoq.
Uummannap sulluani qinngorpasinnerusumut nuussisinnaaneq aamma misissorneqarpoq nunaqarfiit Ikerasaap aamma Saattut eqqaanni sukkaniutsitsilluni.
- Kisianni aamma unnuiffissat eqqarsaatigalugit meeqqat inersimasullu inissaqarnissat unamminartortaqarpoq, Mikkel Jeremiassen oqarpoq.
Ilulissani Sisimiunilu qimussertartut peqatigiiffii sapaatip akunnera tulleq pingasunngornermi akereersimasussaapput.
Uummannap sulluani meeqqat soqutiginnittut tamarmik meeqqat sukkaniunnissaannut peqataasinnaatinneqaraluarput. Aamma inersimasuni Uummannap sulluamiut inissanik tallimanik pisarnermit amerlanerusunik tunineqarput annguttuusartut tallimaannasaraluartut marloriaatinngorlugit.
Nuussinissaq pillugu sapaatip akunnera tulleq naatinnagu aalajangertoqassaaq.
Sisimiuniit avannamut qimussit 40-ut missaanniittut Avannaata Qimussersuani ukiormanna peqataasussaagaluarput. Aningaasanut inatsit aqqutigalugu sukkaniunnissarsuaq 750.000 koruuninik aningaasaliiffigineqarnikuuvoq. Aningaasat taakku amerlanerpaartaat atorlugit peqataasussat sukkaniuffiusussamut assartorneqartussaasut KNQK-mi siulittaasoq Mikkel Jeremiassen nassuiaavoq.
Avannaata Qimussersuaaraa martsip 29-at aamma Avannaata Qimussersua apriilip aallaqqaataani KNR-TV-mi toqqaannartumik malinnaaffigisinnaavat.
