Uummannami akunnittarfittaarniartoqarpoq
- Pitsaassuseq qaffasinnerusoq Uummannami amigaatigeqaarput, Uummannaq Fjord Toursimeersoq Bodil Mikaelsen oqarpoq.
Uummannami akunnittarfeqannginnera takornarianut aporfiusarpoq. Takornarianilli sullissisut Uummannaq Fjord Toursimeersut isumaqarput illoqarfik akunnittarfeqalerpat Uummannami takornariaqarneq siuariartortinneqarsinnaasoq.
- Amerlasuut tikikkusuttarput kisianni akunnittarfinnik vandrehjemminillu ujaarlertoqartaqaaq.
Unnuiffissarsisullu pitsaanerusunik neqeroorfigineqarnissartik amigaatigisarpaat:
- Angalaneq akisoorujussuuvoq, ingammik nunanit allaninngaanniit angalaneq akisoorujussuulluni. Amerlasuut tikikkaangamik akunnittarferpalaartumi qasuersaarusuttarput sullinneqarlutillu.
AAMMA ATUARUK Namminersorlutik Oqartussat Hotel Uummannaq pisiarilersaarpaat
Uummannaq Fjord Toursip akunnittarfimmi ulloq unnuarlu kiffartuussisarnissani tamatumalu saniatigut neriniartarfeqarnissaq siunniuppaa.
Akunnittarfilli qaqugu piviusunngussanersoq suli nalunarpoq.
Tassami atuartut angerlarsimaffiat, siornatigut akunnittarfiusimasoq, pisiareqqusaassappassuk akunnittarfinngortinniarpaat, taamaassinnaanngippallu akunnittarfimmik nutaarluinnarmik illoqarfiup qiterpiaani sanaartorniarput.
Uummannarmiut akunnittarfimmik piginnittooqataanissaat kissaatigaat, tamaani aningaasaleeqataasinnaanissaat kissaatigalugu.
- Sulifferput siuariartorami ingerlalluarlunilu, tamannalu aqqutigalugu aningaasaleeqataarusuttunik ujarlerpugut, Uummannaq Fjord Toursimeersoq Bodil Mikaelsen oqarpoq.