Uumasut nakorsaat: Qimmit qimuttut pillugit suliaq ima ilinniarfigaarput
Suliaq tupannermik narrujuummernernillu suliamut attuumassuteqartunut misigissutsitigut ilaatigut aqqutaluginnissimasoq, kiisalu suliamut pineqartumut naalakkersuisuusumut ilungersunarlunilu nuannerpallaarsimanngitsoq, saqqummiunneqaqqammerpoq.
Tassa Qeqertarsuarmi qimmit qimuttut pillugit suliaq.
SULIAP INGERLANIKUUNERA:
Januar 2018:
- Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.
Oktober 2018:
- KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.
November 2018:
- Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.
Marts 2019:
- Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.
Maj 2019:
- DNA-mik misissuineq piareerpoq - inernerali isertuunneqarpoq.
Juni 2019:
- Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.
Juli 2019:
- Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.
Oktober 2019
- Suliaq eqqartuussivimmut anngunneqassangaluaruni pisoqalereersimassammat politiit suliamik misissuinerminnik unitsitsipput.
December 2019
- DNA-mik misissuisimanerup inerneri Kalaallit Nunaanni Qimussertartut Kattuffiat aqqutigalugu avammut siaruarneqarput.
- Uumasup nakorsaata qimmeq kalaallit qimmerinngikkaat uppernarsarpaa.
Namminersorlutik Oqartussanimi uumasut nakorsaanerata Qeqertarsuarmi qimmit qimuttut DNA-vanik misissuinerup inernera sapaatip akunnerani uani sisamanngornermi oqaluttuaraa. Uumasup nakorsaata qimmeq kalaallit qimmerinngikkaat uppernarsarpaa; 50 procentia qimuttoq aamma 50 procentia qimmeq qimuttuunngitsoq. Kisianni qimuttutut 50 procentiini 35 procentia taamaallaat kalaallit qimmiat qimuttoq.
AAMMA ATUARUK Qimmit qimuttut pillugit suliaq: Uumasup nakorsaata DNA-mik misissuinerup inernera maanna oqaluttuaraa
- Siullertut ilinniarfigaarput qanoq pingaaruteqartigisoq qimmit chipinik nalunaaqutsersorlugit kinguaassiornerisa aamma kimit pigineqarnerisa nalunaaqutsersornissaat. Taamaalilluta kingumut takusinnaavarput qimmeq suminngaanneernersoq, Egill Steingrimsson, Uumasunut Nakorsaqarfimmi aamma Inuussutissalerinermut Oqartussaaffimmi uumasut nakorsaanerat, oqarpoq.
Qimmip eqqartorneqaqisup DNA-vanik misissuinerit Statens Naturhistoriske Museumimi Wildlife forensics facilitymi ingerlanneqarput. Taamaalilluni aamma oqartussanit kalaallit qimmiata qimuttup DNA-vanik misissuisitsinerit siullersaat ingerlanneqarpoq.
- Aamma paasisatta ilagivaat kalaallit qimmiat qimuttoq tamakkiisumik sumit kingoqqiveqarnersoq ullumikkut ersarissumik oqaatigineqarsinnaanngitsoq, Egill Steingrimsson oqarpoq.
Kalaallit qimmianik qimuttunik suliaq Qeqertarsuarmeersoq tamanit ilisimaneqalerpoq Kalaallit Nunaanni Qimussertartut Kattuffiata, Nuummit Qeqertarsuarmut qimminik allanertanertanik eqqussisoqarsimasinnaaneranut pasilliuteqartoqarnera pissutigalugu, qimussertartut Qeqertarsuarmiut aamma Kangerlummiut oktobarip 17-ani 2018-mi Avannaata Qimussersuanut mattummagit.
AAMMA ATUARUK Qimmit qimuttut pillugit suliaq: Politiit misissuinertik unitsikkaat
Tamannali sioqqullugu qimussertartut kattuffiat qimmit pasilliutigineqartut DNA-visa misissorneqarnissaannut nipaatsumik sorsuuteqarsimavoq, qimmerlu ataaseq 2018-ip aasaanerani DNA-mik misissugassanut tiguffigineqarpoq. Tamanna pivoq uumasut nakorsaata qimmit pineqartut kalaallit qimmerineraat qimuttut assitigut nalilersinnaasimanngimmagu.
- Tassa imaakkami qimmit kalaallit qimmerineraat imaaliallaannaq takusinnaanngilarput. Kalaallimmi qimmia qimuttoq tamakkiisumik sumit kingoqqisuunersoq oqaatigineqarsinnaanngilaq, Egill Steingrimsson oqarpoq.
Qimmillu pasilliutigineqartup aappaata DNA-va, kukkusoqareerluni qaammaterpaalunnilu kinguaattoortoqareersoq, misissorneqarluni 2019-imi maajim piareerpoq.
- Ullumikkut pissutsit taamaatsillugit DNA-nik suliaqarsinnaaneq periarfissaanngilaq. Kisianni immaqa siunissami periarfissaalersinnaavoq, Egill Steingrimsson oqarpoq.
AAMMA ATUARUK DNA-mik misissuineq piareertoq
Qimmit qimuttut qimmillu uumasuutigineqartut 2017-imi januaarip aallaqqaataanit qimminut akiuussutissanik assigiinngitsunik pingasunik kapineqartalernissaat, kiisalu chipinik nalunaaqutsersorneqartarnissaat
inatsisitigut piumasaqaatinngorpoq. Taakkua saniatigut nuna tamakkerlugu uumasuutigineqartut nalunaarsuiffimmik pilersitsisoqarpoq, tassani ilaatigut qimmit amerlassusaat nalunaarsorneqartarput.
- Sakkussarput pitsaanerpaaq tassaavoq qimmit pillugit qitiusumik nalunaarsuiffik. Tassunga kommuunit sumiiffimmi qimmerineqartut nalunaarsortarpaat. Tassa taanna atorlugu sulisinnaavugut, Egill Steingrimsson oqarpoq.
Qimmeq Projektimit qimminik allanertanik suli pasilliuteqartoqarpat, pasineqartut DNA-vanik misissuisoqarnissaa innersuussutigineqarpoq. Misissuineq, Qimmeq Projektermiut nalunaarutaat naapertorlugu, qimmimut ataatsimut 2.000 koruuninik akeqassaaq, qimmit misissorneqarniartut 200-juuppata. Misissuinerlu qaammatini sisamanit tallimanut sivisussuseqarsinnaassalluni.
