Uumasunut inissiigallartarfik matoqqasoq

Uumasut Ikinngutaasa uumasunut inissiigallartarfiat matoqqagallarpoq. Taamaattumik uumasuutigisat ajoqqusissagaluarpat imaluunniit napparsimalissagaluarpat Kommuneqarfik Sermersuumi uumasunut peqqissaasoq Sofie Ahn Lauridsen-imut saaffiginnissaatit, taanna kommunimi Avatangiisinut Teknikkimullu Ingerlatsivimmi sulivoq.

Uumasut Ikinngutaasa uumasunut inissiigallattarfiat oktoberip 16-ianiit novembarip 12-ata tungaanut matoqqavoq.

Uumasut Ikinngutaat nittartakkaminni imatut allapput:

- Uumasunut inissiigallatarfiup nutaamik ulluinnarni aqutsisoqalernera pissutigalugu pisariaqarsimavoq piffissami aalajangersimasumi matoqqanissaq neriuutigaarpullu tamanna paasineqarluassasoq, taama ukiorpassuarni uumasunut inissiigallartarfimmi aqutsisuusimasoq Susanne A. Markdal ilisimatitsivoq.

Nuummi ukiorpassuarni uumasut atugarisaat pitsanngorsaavigalugit suliniuteqartoq ulluinnarnilu uumasunut inissiigallartarfimmi aqutsisuusimasoq Susanne A. Markdal ukiut 38-it Nuummi najugaqareerluni Danmarkimut nuuppoq. Uumasut Ikinngutaanut pilersitseqataavoq ukiorpassuarnilu siulittaasuulluni.

- Uumasunut inissiigallartarfik aamma Uumasut Ikinngutaat Vivi Eugenius ulluinnarni aqutsisoralugu ingerlaannassapput. Suliarlu toqqissisimallunga Vivimut ikiortigisaanullu tunniuppara, Susanne A. Markdal taama allappoq.

Uumasut Ikinngutaanut imaluunniit uumasunut inissiigallattarfik pillugu paasisaqarnerorusukkuit nittartagaat uani www.dyrenesvenner.gl alakkarsinnaavat.