VIDEO Taamani uuliamit millionit muloraannarmata
Aatsitassat, royalties uuliasiornerlu pinngitsoortoq, KNR-kkut ippassaq sisamanngornermi oqallittoqarmat oqallisigineqartut ilagaat.
Allattoq Jens Thorin
novembarip 14-at 2014 13:31
Aningaasat uuliamit isaatitassavut millionilikkaat utaqqileruttorivut, Nunarput Dubaitut ittut tullerissagaat aviisini qulequtaavoq. taamali pisoqanngilaq, politikerilu maanna nassuerpoq, neriusaarivallaarsimalluni.
Siumumeersoq Kenneth Rasmussen aatsitassaq pillugu ippassaq oqallinnermi oqarpoq, IA Demokratillu uuliamit sinnassagaasimasut.
- IA-p Demokratillu naalakkersuisuunerisa nalaanni uuliamit aningaasanik isaatitsinissarsuarmik isumalluartoqarpoq, partiillu taakkua sinnassagaapput. Uagut sinnassagaanavianngilagut, Kenneth Rasmussen oqallinnerup qallunaatoortaani oqarpoq.
Kisianni Naalakkersuisut Siumumit siuttuuffigineqartut aatsitassat pillugit periusissiaanni uulia isumalluarfigeqisoq oqaliinermi aqutsisup tikkuarpaa.
- Partiitsinni isumalluartuuvugut. Aammali aningaasarsiorneq eqqarsaatigisariaqarparput, taavalu suna sunaluunniit aallunniassanerlugu. Nalunngilarput aatsitassaqartoq taakkualu aallunnerusariaqarpagut, Siumumeersoq Kenneth Rasmussen oqarpoq.
Demokraatit siulittaasuat, Andreas Uldum, isumaqarpoq, uuiliamit isertitassarsuarnik sinnatuaqilersitsinermut partiini kisimi pisuunngitsoq, kukkusimaninili nassuerutigaa.
- Uuliamit isertitat milliardilikkuutaat isaaginnalernissaannik partiit tamarmik innuttaasunut neriulersitserujussuarsimasut isumaqarpunga. Uanga siulliullunga nassuerutigissavara, neriunnermik pilersitseqataasimagama. Uanga nammineq taamaassasorigaluarpara. Piviusorli maanna qiviartariaqarparput. Piviusorlu tassaavoq, nunarput maannakkorpiaq aningaasaliiffigineqarumanngimmat, sangusajaarneq atugassiissutillu peqqutigalugit, Andreas Uldum ippassaq oqallinnermi qallunaatuumi oqarpoq.
