Uuliamik assartuussuit sikusiorsinnaanngitsut Rusland avannaqqullugu Issittup imartaatigoorsinnaalertut
Umiarsuit uuliamik assartuutit Rusland avannaqqullugu kangianut aqqut atorlugu ingerlaarsinnaanissaat Ruslandip akuersissutigaa.
Umiarsuit sikusiorsinnaanngitsut Rusland avannaqqullugu taamaasillutik Issittup imartaatigoorsinnaalerput, naak sikusiorsinnaanissamut isumannaarneqarsimanngikkaluartut.
Aviisi Financial Times taama allaaserisaqarpoq.
Umiarsuit Issittup imartaatigoorneranni uuliakoortoqaratarsinnaanera maanna aarleqqutigineqalerpoq.
Avatangiisinik illersuiniaqatigiiffimmi Greenpeacemi Tuluit Nunaanni siunnersortaaneq, Charlie Kronick, Financial Timesimut taama oqarpoq.
Rusland Ukrainemik saassussilermalli nunat tamalaat Ruslandimut pillaatitut iliuutsinik atuutsitsilermatali Ruslandip uuliamik avammut tunisassiorsinnaanera innarlerneqarpoq, avammullu tunisaqarsinnaassusia aamma killeqalerluni, umiarsuit uuliamik assartuutit Rusland avannaqqullugu kangianut aqqut atorsinnaalissagaat Ruslandip taamaammat akuersissutigaa.
Ruslandip Rusland avannaqqullugu kangianut nunanik tamalaanik niueqateqarnermini ukiuni kingullerni atornerulersimavaa, assersuutigalugumi Kinamut aqqut naannerulerluni.
Nunarsuarmi silap ataatsimut isigalugu kiatsikkiartornera pissutaalluni Rusland avannaqqullugu immakkut aqqut aasaanerani atorneqarsinnaanerulerpoq, assersutigalugu Suezkanali aqqutigalugu angallannermut naleqqiullugu aqqut naannerulerluni.
