Uuliakoortut: Isumaqarlutinngooq annat
Perusuersartarfiit imaannik milluaat Ilulissat Transportimeersoq marlunngornermi milluaavoq. Taakku isumaqarsimapput tankip imai tassaasut perusuersartarfiit imaat unnuullu ingerlanerani taakku imaanut maqinneqarput sukkulaaliorfimik pisagaasa eqqaanni.
Kisianni tassa paasinarsivoq uuliakoq 5.000 liter maqinneqarsimasoq.
- Umiarsuarmit ilisimatinneqarpugut anartarfiup imarisaanik imaarsiniartut, taamaalilluta taanna tigusimavarput, Ilulissat transportimi allaffimmi pisortaq Michael Kleist oqarpoq erseqqissaallunilu uuliakumik aalleqqusisoqarsimagaluarpat itigartitsisimassagaluarlutik.
Takornariartaat Clipper Adventure ippassaq Ilulissaniippoq, tassanngaanniit Ilulissat transport saaffigineqarpoq, umiarsuarmi anartarfiit tankia imaarsinnaaneraat.
- Apeqqutigeeqqaarparput uuliakuunersoq. Taava paasitinneqaratta anartarfiup imarisaanik imaarsiniartut, taanna tigusimavarput, Michael Kleist oqarpoq.
Ilulissani sillimaniarnermut upalungaarsimasut uuliakumik saliinerat ippassaq unnukkut aallartippoq, sulilu saliipput. Maannamut imaq uuliamik akulik 8.000 literit missaanniittoq milluarneqareerpoq, imaanilu uuliakup nugunnissaata tungaanut saliisoqassaaq.
Ilulissat transportimi sulisut imaanut maqitsinerminni mingutsitsineq takusinnaasimanngilaat.
- Unnuaq sikualuit tulassimariarmata kuuffialu immap iluaniilluni takusinnaasimanngilarput sumik kuutsitsinerluta, Michael Kleist oqarpoq.
Ilulissat transportimit kukkuluttortoqarneratigut tassanerpiaq ukiut sisamat matuma siorna aamma uuliaarluertoqarpoq, taamanilu suliffeqarfik saliinermut akiliisitaavoq.
