Uuliaatilissuunngikkaluarluni namminiilerneq
Minik Rosing isumaqarpoq, Nunatsinni uuliamik nassaanngitsoornerit qissatigisariaqanngitsut.
- Kalaallit upperisaat tassalu namminiilernissamik ineriartortitsineq namminerlu pingaartitanik aallaavilik eqqarsaatigiinnarlugit, uuliamik tassanngaannaq aningaasarsiulernermik taarsissagaanni tamanna pitsaasuunaviarunanngilaq. Tassami nuna mikisunnguaq uuliamillu annertuupilussuarmik pilik ajornartorsiortarpoq, aviisimut Politikenimut Minik Rosing oqarpoq.
Taanna isumaqarpoq, nunarsuatsinni silap kissakkiartornerata pilersitaanik Nunarput aningaasarsiorfissanik allanik ujarlertariaqartoq.
- Kalaallit Nunaannut tigussaanerussaaq aatsitassarsiortunut sullissisuugaanni. Aamma umiarsualivinnik illoqarfinni assigiinngitsuni sanaartortoqarsinnaavoq, issittumi immap aqqutigineqaleraluttuinnarnera eqqarsaatigalugu. Usingiaanerit, immakkut annaassiniarnerit umiarsuarnillu kiffartuussinerit kalaallinut naleqqulluarput pikkoriffigineqarlutillu, aammalu inuiaat aaqqissuussaanerannut kalaallillu inooriaasiinut tamakku naleqqulluaramik, siunnersuuteqartoq Minik Rosing oqarpoq.