Helene Thiesen arfineq-marlunnik ukioqarluni Danmarkiliartinneqarpoq. Assi toqqorsivimmit.Assi: Helle Nørrelund Sørensen/KNR

Helene Thiesen: Utoqqatsertoqarnissaa neriuutigaara

​​​​​​​Kalaaliaqqat 22-t misileraatitut Danmarkiliartitaanerannik suliap qanoq ingerlasimaneranik ukiut 68-it qaangiuttullu, susoqarsimanera naalagaaffimmit qulaajarneqartussanngorpoq.

Kim Kielsenip Lars Løkke Rasmussenillu taamani qanoq pisoqarpiarsimaneranik qulaajaasoqarnissaa aalajangiuppaat.

Meeqqanit 22-usunit maanna arfinillit suli akornatsinniipput, 74-inillu ukiulik Helene Thiesen taakkununnga ilaavoq.

- Tupaallannarpoq nuannaajallannarlunilu, tassami qulaajaaffigineqalerpoq. A-miit Z-imut qanoq pisoqavissimanerata misissorneqalernera ajunngilluinnarpoq, arfineq-marlunnik ukioqarluni Danmarkimut aallartitaasoq Helene Thiesen oqarpoq.

AAMMA ATUARUK Naalagaaffiup utoqqatsernissaa pissusissamisoorluinnarpoq

Meeqqat 22-t Danmarkimut 1951-imi aallartitaapput danskillu atuarfiini oqaatsinik kulturiannillu ilinniartinneqarlutik. Nunatsinnut uterunik inuiaqatigiinni danskisut inuunermut maligassiuisuunissaat taamani neriuutigineqarpoq.

Statsministeri utoqqatserumanngitsoq

1950-ikkunni pissutsit allarluinnaaneri tunngavilersuutigalugu Danmark pisortatigoortumik utoqqatsernissaa pissusissamisuunngitsoq Lars Løkke Rasmussen 2009-mili oqarpoq, assigusumillu maanna aamma oqarluni.

AAMMA ATUARUK Utoqqatsertariaqarneq Siumumit taperserneqartoq

Taamani qanorpiaq pisoqarsimanera misissuiffigilluaqqaarneqassasoq, danskillu meeqqanut isumaginninnermullu ministeriata Mai Mercadop (K) isumaginninnermullu naalakkersuisup, Martha Abelsenip (S) oqaluttuarisaaneq pillugu nassuiaateqartoqarnissaa suleqatigiissutigissagaat Kim Kielsenip KNR-imut oqaatigaa. Taakkulu utoqqatsertoqassanersoq aalajangerumaarnerarlugu.

- Tamanna eqqarsarnartoqarpoq. Misissuisoqarluarnissaa neriuutigaara, taamaalilluni utoqqatsertoqartariaqarnera takuneqarsinnaalissammat. Tamanna inissaminiilluinnarpoq, Helene Thiesen oqarpoq.

Chemnitz: Ataqqinninnginneruvoq

Qanoq pisoqarsimanera atuakkiarineqareerlunilu isiginnaagassiarineqareerpoq. Utoqqatsernissamullu ilisimasat naammakkaluartut folketingimut ilaasortaq Aaja Chemnitz Larsen oqarpoq.

- Ilisimasanik naammannginneraaneq aamma naalagaaffiup utoqqatsernissaanut oqaluttuarisaanermi qulaajaasimanernik naammannginneraaneq, meeqqanut misileraatigineqarnikunut ataqqinninnginneruvoq, Aaja Chemnitz Larsen oqarpoq.

AAMMA ATUARUK Meeraanerminni misileraatigineqartut Danmarkip utoqqatserfigisariaqarpai

Taassuma Danmarkip meeqqanut pisortatigoortumik utoqqatsernissaa siunersuutigisaraa.

- Inuit taakkua ullumikkut utoqqatserfigineqarsinnaasut qulaajaaneq piareerpat suli peqqissuujumaarnersut naluarput. Misissuinermi ukiorpassuit qaangiuppata aatsaat naammasserataannaavoq, Aaja Chemnitz Larsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat