Utoqqatsertariaqarneq Siumumit taperserneqartoq
- Taamatut piumassuseqartoqarnera pissusissamisoorpoq, Laura Táunâjik oqarpoq.
Folketingimut ilaasortap Aaja Chemnitz Larsenip Folketingimi aalajangiiffigisassatut tallimanngormat siunnersuutigaa kalaallit meeqqat 1950-ikkunni angajoqqaaminnit arsaagaallutik Danmarkiliartitaasut naalagaaffimmit pisortatigoortumik utoqqatserfigineqartariaqartut.
Meeqqat aqqusaagaat sakkortusimaqaat inuunerminnilu kingusinnerusukkut kingunerluutigisimavaat. Taamaammat inuunerminni ingerlariaqqinnissaat anguniarlugu utoqqatsernissaq pisariaqarluinnarpoq.
- Sunaluunniit oqaasinngortissimanngisaq qamani ilumi pigiuartillugu eqqissisinnaannginneq inuppassuulluta misigisimavarput, kisianni oqaasinnguinikkut utoqqatserfigineqarneq isumalerujussuusoq taanna qularutiginngilara.
AAMMA ATUARUK Meeraanerminni misileraatigineqartut Danmarkip utoqqatserfigisariaqarpai
Nunatsinni taamani Landsrådiusut naalagaaffik peqatigalugu suliniummik tapersersuipput. Nunatsinnili oqartussat tapersiisimanerminnut pisortatigoortumik utoqqatsernikuunngillat.
Laura Táunâjillu naapertorlugu Naalakkersuisut akisussaaqataallutik kalaallinut misileraatigineqartunut aamma utoqqatsertariaqarput.
- Kukkuneq ajuusaarnartuuvoq tamannalu aamma kingunerluutaasimasut pillugit maannakkut siuttuusut immikkut aamma oqaaseqartariaqarnerannik utoqqatsertariaqarnerannik isummerneq isumaqataaffigivara.
