Aaja: Meeraanerminni misileraatigineqartut Danmarkip utoqqatserfigisariaqarpai
Folketingimut ilaasortap Aaja Chemnitz Larsenip Folketingimi aalajangiiffigisassatut tallimanngormat siunnersuutigisaa taama oqaasertaqarpoq.
Meeqqat pineqartut 1950-ikkunni Danmarkimi ilaqutariinnut aallartitaapput danskillu atuarfiini oqaatsinik kulturimillu ilinniartinneqarlutik. Nunatsinnut uterunik inuiaqatigiinni Danmarkimut samminerutinniartuni maligassiuisuunissaat taamani neriuutigineqarpoq.
AAMMA ATUARUK Hammondip meeqqat misileraanermi peqataasimasut utoqqatserfigineqarnissaat ujartorpaa
Meeqqalli ilarpassuisa nunatsinni ilaquttatik uterfiginngitsoorpaat. Allallu angerlaramik ilaatigut oqaatsiminnik annaasaqarnertik pissutigalugu ajornartorsiulerput meeqqallu angerlarsimaffiinut inissinneqarlutik.
Meeqqat taamani aqqusaagaat sakkortusimasaqaat inuunerminnilu kingusinnerusukkut kingunerluutigisimallugit.
AAMMA ATUARUK Knud Foldschack: Naalagaaffik aamma utoqqatsertariaqarpoq
- Utoqqatsertoqassappat eqqissinermik ikilernikuunermillu mamitsinermik inerneqarsinnaavoq innuttaasut ilaasa suli piffissaq naligiinnginnerujussuarmik imalik eqqaamammassuk. Naak piffissami allami pinikuugaluartoq naalakkersuisullu allat aqutsisut taamani aalajangiisuugaluartut pisut suli maannamut malugineqarsinnaapput sulilu equngassutaanikoq amerlasuunit eqqaamaneqarluni, Aaja Chemnitz Larsen tusagassiorfinnut nalunaarummi taama allappoq.
Suliniaqatigiiffiup Red Barnetip 1950-ikkunni suliniutigineqartoq peqataaffigaa. Suliniaqatigiiffiup eqqugaasut 2009-mi pisortatigoortumik utoqqatserfigai, kingornalu aamma 2015-imi.
Nunatsinni taamani Landsrådiusut naalagaaffik peqatigalugu suliniummik tapersersuipput. Nunatsinnili oqartussat taama tapersiisimanerminnut pisortatigoortumik utoqqatsersimanngillat.
Taamaammat Inuit Ataqatigiit Naalakkersuisunut apeqqutigaat naalagaaffimmit utoqqatsertoqarnissaa Naalakkersuisut tapersersorneraat, nunattalu taamani pisumut qanoq akisussaaffeqarnera qanoq isumaqarfigineraat.
AAMMA ATUARUK Meeqqanik misileraasoqarnerani peqataasimasup utoqqatserfigineqarnertik oqaasertalerpaa