Ukiut qulikkaat tallimaat nikingagaluarlutik: Utoqqaat meeqqanik Sisimiuni timersoqateqartut

Sisimiut timersortarfianni illarpalaaq qungujulanerlu naammattuugassaapput.

Ataatsimoornermi pineqartumi peqataasut ukiut qulikkaat tallimat amerlanerusulluunniit ukiumikkut nikingapput.

Tassaaku utoqqaat timersoqatigiiffiat Eqartoq meeqqerivimmilu Naja Aleqamittut timersoqatigiittut.

- Qeqqata Kommuniata anguniagarivaa kinguaariit akimorlugit ataatsimoorfeqarnissaq tamannalu timersoqatigiif kattuffiannik GIF-mik suleqateqarnissamik isumaqatigiissummi aamma ilaavoq, Qeqqata Kommuniata GIF-imik suleqateqarnerani suliuniummi atorfilik Apollonie Kreutzmann KNR-mut oqarpoq.

Oktoberip 25-at aallartisartooqarpoq utoqqaat meeqqerivimmiullu timersortarfimmi timersoqatigiimmata.

Ilisimatusartut malinnaapput

- Ilaatigut attortaattoqarpoq. Suliniummi aamma anguniagaangami kinguaariinni sorlermiinneq apeqqutaatinnagu ataatsimoorfeqartutut misiginissaq misilittakkanillu paarlaasseqatigiinnissaq, Apollonie Kreutzmann oqarpoq.

- Eqqariikkattut attortaattoqarpoq utoqqaat meeqqallu tasioqatigiillutik arpallutik. Taava meeqqat assaat atorlugit nalorsitsaarisarnermik utoqqaat ilitsersuuppaat ilaasa taanna ilisimavallaanngimmassuk, Apollonie Kreutzmann oqarpoq.

Suliniut meeqqerivinnut allanut Sisimiuni siaruaakkiartussaaq siunertaavorlu minnerpaamik qaammammut ataasiarlutik utoqqaat meeqqallu ataatsimooqatigiittarnissaat.

- Naapinneq siulleq sioqqullugu utoqqaat aamma eqqartoreersimavaat neqeroorniarlutik meeqqerivimmut pulaarniarlutik kalaaliminernik nassarlutik takutinniarlugu qanoq sassaalliutigineqartarnersut, Apollonie Kreutzmann oqarpoq.

Nuannersumik ataatsimuualaarneq timigissarnerlu ilisimatusarnermik aallaaveqartumik malinnaaffigineqalerpoq.

- Innuttaasut peqqissusaannik misissuivik aningaasaliiffigineqarpoq suliniummut malinnaanissamut tamatuma kinguneri misissorneqassammata, Apollonie Kreutzmann oqarpoq.

Siorna aamma utoqqaat inuusuttuaqqallu Sisimiut eqqaanni asiarsimaaqatigiisinneqarput.