Assi: KNR/Arkiv

Utoqqaat inuunerminni atugaat suliniummi nutaami misissuiffigineqalersut

Nunatsinni utoqqaat inuunerminni qanoq atugaqarnersut suliniummi nutaami misissorneqartussanngorpoq. Suliniut, Arktisk Aldring (Issittumi Utoqqaliartorneq, aaqq.) aningaasaateqarfimmit Velux Fondenimit 5,6 millionit koruuninik aningaasaliiffigineqarpoq.

Ilisimatusaatigaluni ineriartortitsinermik suliniut Københavnip Universitetiata Peqqissutsimik ilisimatusarfiani Center for Humanistisk Sundhedsforskningimi lektorimit Tenna Jensenimit siuttuuffigineqassaaq.

- Suleriaatsit ilisimarusarnerillu ataatsikkoortillugit ingerlanniarpagut, Tenna Jensen tusagassiorfinnut nalunaarummi taama oqarpoq.

Taanna aamma nassuiaavoq suliniummi Nunatsinni pissutsit pillugit kulturikkut ilisimasat utoqqarnillu sullissinermi misilittakkat ilanngunneqarumaartut.

Suliniutillu nutaat atuutilersinniarneqarnerinut kommunit suliniutigineqartumi qitiusumik inissisimassapput.

Taamaammat kommunit, Københavnip Universitetia, Ilimmarfik, Atugarissaarneq pillugu Ilisimatusarnikkut Danmarkimi misissuisoqarfik, Syddansk Universiteti aamma Professionshøjskoli qanittumik suleqatigalugit suliniut ineriartortinneqarlunilu ingerlanneqassaaq.

Suliniut 2020-p naanerata tungaanut ingerlanneqassaaq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl