Aqutsisuusimasoq: Utoqqaat illuannik milliliineq init ikippallaarnerannut pissutaavoq

Maniitsumi utoqqaat illuat inissaqanngimmat illoqarfiup utoqqartaasa ilaat napparsimmavimiitsitaasarput. Tamanna ataatsimik pissuteqartoq isumaginninnermi pisortaq oqarpoq, pissutsilli allaasut aqutsisuusimasoq nassuiaavoq.

Allattoq Nicole Sander Bertelsen

juulip 15-at 2024 07:34

Maniitsumi utoqqaat napparsimanngikkaluarlutik illoqarfiup napparsimmavianiitsinneqartartut, KNR-ip qaammatip ataatsip matuma siorna juunip qulingani allaaseraa.

Maniitsumi utoqqaat illuata sulisussaalatsineranik tassanilu sulisut ilinniarsimasuunngitsortaqarnerannik pissuteqartoq, Qeqqata Kommuniani isumaginninnermut pisortaq, Paneeraq Olsen oqarpoq.

- Sulisut utoqqarnik sullissisussat katillugit 34-upput, taakkunanngalu 25-t peqqissaanermut tunngasumik ilinniagaqarput, Paneeraq Olsen apersorneqaqqinnermini itisiliivoq.

Taassuma saniatigut ikiortitut sulisut 18-it suliaminnut tunngatillugu ilinniagaqartussaagaluartut ilinniagaqanngitsut, taanna oqarpoq.

SULIAQ NAATSUMIK

Maniitsumi utoqqaat marluk illoqarfimmi utoqqaat illuanni inissaqannginnamik paaqqineqartariaammatalu angerlartiinnarneqarsinnaanngitsut piffissami sivisujaami napparsimmavimmiitsitaasut, KNR-ip juunip qulingani allaaseraa.

Taamaattumik utoqqaat marluk napparsimanngikkaluarlutik napparsimmavimmiitsinneqarput.

Paaqqutarisariaqaqisumik ulloq unnuarlu napparsimmavimmiititsinermut kommuni juunimi 6.000 koruuninik akiliuteqartarpoq. Napparsimmavimmiititsisarnerup akisuallaarnera allatullu iliorsinnaanngikkallarnertik isumaginninnermi pisortap juunimi nassuerutigaa.

Akiliutigineqartartoq juulimi 7.600 koruuninut qaffanneqarpoq.

Isumaginninnermili pisortap tunngavilersuutaa utoqqaat illuanni aqutsisuusimasup, Anders Søholmip taperserpallaanngilaa.

Taanna Maniitsumi utoqqaat illuata nutaap 2008-mi 2009-milu sanaartorneqaleruttornerata nalaani atorfinipppoq aqutsisuullunilu, kommunillu taamani kattussuunneqaleruttorput.

Utoqqaat illuanni inissaqannginneq Paneeraq Olsenip tunngavilersuutaanit allaanerusoq taanna oqarpoq.

- Sanaartornissaq 2008-mili aalajangiunneqarmat inissat ullumi killeqalernissaat nalunanngereerpoq, Anders Søholm oqarpoq.

- Utoqqaat illuliornissaq pilersaarusiorneqarmat quleriit ullumikkornit ataatsimik amerlanerussasut pilersaarutaaqqaarpoq. Sanaartornerli aallartereersoq sipaarniartoqarmat quleriit ataatsimik ilanngarneqarput, tamannalu pissutigalugu maanna inissaqanngilaq, taanna oqaluttuarpoq.

- Tamanna utoqqaat inuuunerminnik ingerlatitseqqilluarsinnaannginnerannik kinguneqarpoq, napparsimasutummi napparsimmavimmiitsinneqartarput, Anders Søholm oqarpoq.

Utoqqaat illuata marluinnarnik qulereeqarnera aningaasaqarnermik peqquteqartoq utoqqaat illuanni aqutsisuusimasoq oqaluttuarpoq.

Paaqqineqartariaqaqisunut inissat peerneqartut

Quleriinnik ilanngaaneq inissat aqqaneq-marluk 16-illu missaanniittunik annaasaqarnermik kinguneqartoq, Anders Søholm oqarpoq.

- Taama aalajangernerup kingunerisassai taamani kommunip ilisimareerpaa. Utoqqaammi paaqqutarineqartariaqaqisut siunissami amerlinissaat sillimaffiginiarlugu quleriit amerlanerunissaat pilersaarutaagaluarpoq, Anders Søholm oqaluttuarpoq.

Utoqqaat illuat 44-nut maanna inissaqarpoq, utoqqaalli 56-it 60-illu missaanniittunut inissaqarnissaat pilersaarutaaqqaaraluarpoq.

Anders Søholmip oqarnera naapertorlugu paaqqineqartariaqaqisut puigortunngortullu inissani peerneqartuni ineqartussaagaluarput.

Immikkoortortaqarfiliorneq aaqqiissutaasoq

Tamanna utoqqaat ilaasa paaqqineqartariaqaqisut angerlartiinnarneqarsinnaannginnerat pissutigalugu napparsimmavimmiitsinneqartarnerannik kinguneqarpoq.

Utoqqaat illuata 2009-ip naalernerani atorneqaliinnarneranili ajornartorsiuteqartoq Anders Søholm oqariartuuteqarteqartarnerarpoq, ajornartorsiulli iliuuseqarfigineqarniarpasinngitsoq misigivoq.

- Paneeraq Olsen 2009-mi 2010-lluunniit aallartinnerani kommuninut kattuteqammersunut kommunaldirektøriusoq aamma taamani isumaginninnermut pisortaasoq ataatsimeeqatigaakka, inissaleqisoqalerneralu aamma siunissami ajornartorsiutaaleraluttuinnassasoq oqaatigaara.

Utoqqaat illuanni aqutsisuusimasup oqarnera naapertorlugu aarleqquteqqutini pillugu Paneeraq Olsen akisimanerarpaa tamanna ajornartorsiutinngornavianngitsoq, Neriusaallu eqqaani arsaattarfimmi immikkoortortamik sanaartortoqapallariaannaasimanerarpaa.

Tassa ajornartorsiortoqalissagaluarpat utoqqaat illuata immikkoortortaanik sananissaq periarfissaanerarpaa.

Tamannali Paneeraq Olsenip eqqaamanngilaa.

- Imaanngilaq isertuussiniarsarigama, sanaaartornerulli nalaani aalajangeeqataanera eqqaamanngiinnarpara. Sanartortoqarnerata nalaani Sisimiuni kommunaldirektøriuvunga, taamaattumik taassunga tunngasumik susassaqarnanga. Kommunit 2009-mi kattussuunneqarmata aatsaat kommunaldirektørinngorama sanaartorneq naammassereerpoq, taamaammat allamik immikkoortortaqarfiliornissamik allatulluunniit taamani aalajangiisinnaananga, Paneeraq Olsen KNR-imit apersorneqaqqinnermini oqarpoq.

Iliuuseqarfigineqanngitsoq

Anders Søholmili allatut misigisaqarpoq:

- Inissaaleqinermik ajornartorsiut qanoq iliuuseqarfigineqassanersoq taamani kommunimit nalornisigineqarpasittoq misigaara, pissutigalugu kommunit kattussuunneqalernerisa naligimmagu, taamaattumillu kommunerujussuanngortussamit akisussaaffigineqassanerarneqarmat, Anders Søholm oqarpoq.

Paneeraq Olsenilli tamanna ilisimasaqarfiginnginnerarpaa.

- Sanaartornermi qanoq pilersaaruteqartoqarsimanersoq naluara, quleriillu ataatsimik ilanngarneqarsimanerannut akisussaasutinniarlunga oqamisaaruit eqqortuunngilaq. Taassuma isornartorsiuinera maanna akisinnaanngilara, qangalimi pisimasuuvoq, Paneeraq Olsen oqarpoq.

Kommunip ajornartorsiummik aaqqiissuteqannginnera Anders Søholmip februaarimi 2010-mi soraaniuteqarnerminut pissutaasunut ilaanerarpaa, ullumilu tupigusunngitsuunngilaq.

Maniitsumi 2008-mi 2009-milu utoqqaat illussaannik sanaartornerup nalaani susoqavissimanera paasiniarlugu taamani akisussaasut akornanni allaqatigiinneq KNR-ip alllagaatinik takunnikkumalluni qinnutigaa.

Qeqqata Kommuniatali sanaartornissamut akuersissut nunaminertamillu tunisinnerup uppernarsaataa kisiisa nassiuppai, allaqatigiinnermulli tunngasunik nassiussinani. Kommunillu allagaateqannginnerminut januaarip aallaqqaataani kommunerujussuanngortitsineq ilaatigut pissutaatipppaa.

Isumaginninnermi pisortaq aamma allappoq aalajangiussat taamani Maniitsup Kommuniani kommunalbestyrelsep aalajangigarigai.

KNR allagaatinik takunnikkumalluni Kommuninik Nakkutilliisoqarfimmut qinnuteqarpoq, sulili akissutissarsinani.

Taamaattumik oqaatigineqartut maannamut uppernarsarneqarsinnaanngillat, susoqarsimaneralu pillugu Anders Søholmip misigisai kisimik oqaluttuarineqarlutik.