Utaqqisut saammaanneqartaleqquaat
Saammaassinerit taamaalillutik pineqaatissinneqarsimasunut inissiisarfinnut utaqqisorpassuarnut, maanna 300-t missaanniittunut, ikilisaaqataassapput.
Inatsiseqarnermut ministeeriaqarfiup siunnersuutaa naapertorlugu, eqqartuussaasimasut qaammatini arfinilinni pineqaatissinneqarsimasunut inissiisarfimmiittussanngortitaasimasut, ukiumi ataatsimi qaammatinilu arfinilinni utaqqereersut saammaanneqarsinnaassapput.
Siunnersuut Namminersorlutik Oqartussanut siornali marsimi nassiunneqareersimavoq, siunnersuutillu sukumiisumik suliarineqarnissaanut eqqarsarfissaqarumallutik, Namminersorlutik Oqartussat qinnuteqaatigisimavaat. Aaqqissuussineq tamatumunnga assingusoq Danmarkimi atuutereerpoq. Inatsiseqarnermut ministeri Morten Bødskov, Enhedslistenimeersumut Pernille Skipper-imut pineqartoq pillugu apeqquteqartumut, akissuteqarluni taama allappoq.
Inatsiseqarnermut ministeeriaqarfimmit oqaatigineqarpoq, Nunatsinni pineqaatissinneqarsimasunut inissiisarfinnut inissat 79-inik amerlineqarsimasut, taakkuli eqqartuussaasimasut amerlassusaannut naammaqqajanngillat.
Danmarkimi 2013-imi aningaasanut inatsisissamut isumaqatigiinniarnernut atatillugu, pinerluttunik isumaginnittoqarfimmi utaqqisunik ajornartorsiuteqarneq aningaasaliiffigineqassasoq, Nunatsinnilu pissutsit matumani ilanngunneqassasut, inatsiseqarnermut ministeri ilisimatitsivoq.
