USA-p qimataanik saliinissaq Danmarkip akilerniaraa
Danskit naalakkersuisuisa USA-p Nunatsinni sakkutooqarfigisimasaani saliinissamut ikinnerpaamik 150 millionit koruunit atorniarpaat.
Amerikamiut Nunatsinni sakkutooqarfigisimasaanni qimaannakkani saliinissap kimit akilerneqarnissaa ukiorpassuarni isumaqatigiinngissutigineqareersoq, danskit naalakkersuisui akiliinissamut piareerlutik nalunaarput.
Ministeriuneq Lars Løkke Rasmussen (V) Naalakkersuisullu siulittaasuat Kim Kielsen siunniussat pillugit nalunaarummik pingasunngornermi atsioqatigiissuteqarput. Savimikunik eqqakkanillu avatangiisinut navianaatilinnik allanik saliinissamut aappaagumit ukiuni tulliuttuni tallimani ukiumut 30 millionit koruunit aningaasaliissutigineqassapput.
Kim Kielsenip ataatsimiinnissaq sioqqullugu oqaatigaa sakkutooqarfiusimasuni saliisoqarnissaanik piumasaqaateqarniarluni.
150 millionit koruunillu saniatigut, saliinissamut Nunatsinni sulisunik suliffeqarfinnillu sapinngisaminik atuisoqarnissaata oqaloqatigiissutigineqarnissaanik isumaqatigiittoqarnera nunatsinni oqartussat qilanaarisinnaavaat.
Isumaqatigiissutip inaarutaasup ukiaru atsioqatigiissutigineqarnissaa naatsorsuutigineqarpoq.
Amerikamiut sakkutooqarfigisimasaanni saliinissamut millionerpassuarnik aningaasaliisoqarnerata saniatigut, Kangilinnguani sakkutooqarfiusimasumi saliisoqarnissaa danskit naalakkersuisuisa aamma neriorsuutigaat.
AAMMA ATUARUK Ilisimatuut Camp Century misissorniaraat
Tamatumunnga peqatigitillugu danskit ilisimasassarsiortitaat Sermersuarmi Camp Centurymi amerikamiut sakkutooqarfigisimasaannukarnissaminnut piareersaatitik kingulliit maanna suliarileruttorpaat.
Amerikamiut eqqagassat 9000 tonsit tungaannut oqimaassuseqartut sermersuarmi atomip nukinganut atortussamit imeq nillorsaat 1967-imi qimaannarpaat.
Danskit ilisimatuui sumiiffimmi tassani eqqagassat sermip aakkiartorneranit saqqummertussat qaqugu piissanersut misissoqqaarniarallarpaat.
