Camp Centurymi saliinissaq professorip mianersoqqussutigigaa

Sermersuarmi qilleraluni ilisimatusarnermi professori Niels Bohr Institutimeersoq, Jørgen Peder Steffensen, aviisimut ullormut saqqummersartumut Metroexpressimut taama oqarpoq.

- Saliisoqarnerani mingutsitsineq salinneqartumit anginerussaaq, professori oqarpoq.

Amerikamiut sakkutooqarfigisimasaat Pituffiup avannaata kangiani kilometerit 200-t missaannik ungasitsigisumi Sermersuup iluani meterinik 40-50-inik itissusilimmiippoq.

Camp Centurymi atomimik nukissiorfimmut erngup nillusaatitut atorneqartup Sermersuup iluanut aniatinneqarsinnaaneranik USA Danmarkimit 1960-imi akuersissummik tunineqarsimanera KNR-ip ippassaq oqaluttuaraa. Taamaaliornissamulli piumasaqaatit sakkortuupilussuit atuutsinneqarput.

Imikorlu ullumikkut ulorianaateqanngimmat assaalluni qallussallugu siunertaqanngitsoq, Jørgen Peder Steffensen isumaqarpoq.

- Maanna ulorianaateqanngilaq. Qeruteqqavoq meterinillu 80-100-nik itissusilimmiilluni.