Kangilinnguani saliinissaq aallartinneqarsinnaanngulersoq
Kangilinnguani saliinissaq piaartumik aallartinneqassaaq. Tamanna Naalakkersuisut siulittaasuata, Kim Kielsenip danskillu illersornissamut ministeriata, Claus Hjort Frederiksenip ullumi isumaqatigiissuteqarfigaat.
Naalakkersuisut, Naalakkersuisut siulittaasuata naalakkersuisoqarfia illersornissamullu ministereqarfik taama ilisimatitsipput.
AAMMA ATUARUK Kangilinnguit septembarimiit sulisoqaqqilissaaq
Saliivittoqarnissaa maannamut isumaqatigiissutigineqarsinnaasimanngikkaluarpoq. Tassani sakkutooqarfiusimasup eqqaavissui marluk uuliamillu mingutsitsinerit isumaqatigiinngissutigineqarsimapput. Taamaammallu saliineq suli aallartinneqanngilaq.
AAMMA ATUARUK Kangilinnguani saliisoqarnissaa Løkkep neriorsuutigaa
Piffinnili taakkunani saliinissaq maanna isumaqatigiissuteqarfigineqarpoq. Tassa eqqagassat, atortorissaarutit illulluunniit illersornissaqarfiup atoqqinnavianngisai isumaqatigiissuteqarfigineqarput. Taamaalilluni piffiit taakku saliiffigineqarsinnaalerlutik suliarerusunnittussarsiuunneqarsinnaalerput. Taamalu suliaqarneq sapaatip akunnerata tulliani aallartinneqassasoq, siulittaasup naalakkersuisoqarfia ilisimatitsivoq.
- Naalakkersuisuniit iluarisimaarparput suliaq aallartinneqalermat. (…) Sakkutooqarfiup maanna saliiniarluni aallartinnerata saniatigut Naalakkersuisunit siunissaq ungasinnerusoq isigalugu avatangiisinik saliisoqarnissaanik piumasaqaateqarnerput allanngunngilaq. Illersornissamut ministereqarfimmik oqaloqateqartarnitsinni piumasaqaat tamanna aamma annikillissanngilaq, Kim Kielsen oqarpoq.
AAMMA ATUARUK Kangilinnguini saliisoqarnissaa pillugu Danmark pilersaarusiorpoq
Uuliamik mingutsitsinerit eqqaaviillu marluk maannamut isumaqatigiinngissutigineqartut illunik eqqagassanillu saliinerup ingerlanneqarnerata saniatigut suli isumaqatigiinniutigineqassapput.
Saniilermut atatillugu nunaqavissut suliffiutillit sulisartullu kalaallit tamakku isumagineqarnerini sukkut atorneqarsinnaanersut misissorneqassaaq, illersornissamullu ministereqarfiup nunatsinni oqartussat peqatigalugit suliassat qanoq pitsaasumik avatangiisillu mianeralugit qanoq suliaqarnissaq misissussavaa.
Naalakkersuisut atortukut eqqagassallu siulliit Kangilinnguanit 2018-imi peerneqarnissaat neriuutigaat.
AAMMA ATUARUK Grønnedal koster minimum 25 mio. kr. om året