USA-p naalagaaffiata akiitsui pillugit isumaqatigiissut senatimi taasissutigineqartoq
USA-mi naalagaaffiup akiitsuisa qummut killingisa atorunnaarsinneqarnissaannut isumaqatigiissut, USA-mi senatimi amerlanerussuteqartut ippassaq sisamanngornermi unnukkut akuersissutigaat.
USA-mi naalagaaffiup akiliisinnaajunnaaratarsinnaanera taamaasilluni pinngitsoortinneqarpoq.
USA-mi naalagaaffiup akiitsuisa qummut killingat pillugu isumaqatigiissusiornermi naalagaaffiup akiitsui amerlanerpaaffimminniitsinniarneqarput.
USA-p præsidentiata, Joe Bidenip isumaqatigiissut tassa atsiorlugulu atuuttussanngortissavaa. Isumaqatigiissut senatimi taasissutigineqarmat, 63-it akuersipput 36-llu akerliullutik.
USA-mi naalagaaffiup akiitsuisa qummut killingat 31.400 milliardit dollariupput, Joe Bidenillu isumaqatigiissut atsiorpagu qummut killingat 2025-mi januaarip aallaqqaataata tungaanut atuukkunnaarsinneqassaaq.
Isumaqatigiissut innuttaasut sinnerlugit sinniisoqarfimmi, tassa Repræsentanternes Husimi, ippassaani pingasunngornermi akuersissutigineqarpoq.
USA-mi inatsisartut naalagaafffiup akiitsuisa qummut killingat pillugit isumaqatigiissusiorsinnaanngippata, naalagaaffiup aningaasartuutit juunip ulluisa tallimaata kingorna matussusersinnaassanngikkai, USA-mi aningaasaqarnermut ministereqarfiup siusinnerusukkut mianersoqqussutigaa.
- Akiliisinnaajunnaaratarsinnaanerput unnummut pinngitsoortipparput, USA-mi demokratit senatimi siuttuat Chuck Schumer oqarpoq.
Biden republikanerillu Repræsentanternes Husimi siulittaasuat, Kevin McCarthy, USA-mi naalagaaffiup akiitsui pillugit isumaqatigiissusiortuupput.
