USA-p naalagaaffiata akiitsui pillugit akunnerup naanerani isumaqatigiittoqassagunartoq
USA-p præsidentiata Joe Bidenip republikanerillu USA-p naalagaaffiata akiitsui pillugit isumaqatigiinniarneranni illuatungeriit imminnut suli ungasipput.
USA-lli naalagaaffiata akiitsui pillugit sapaatit akunnerata massuma ingerlanerani isumaqatigiittoqarsinnaanissaa ilimanartoq, republikanerineersoq innuttaasut sinnerlugit sinniisoqarfimmi siulittaasoq tassa Repræsentanternes Husimi siulittaasoq Kevin McCarthy oqarpoq.
USA-p naalagaaffiata akiitsui pillugit isumaqatigiittoqarnissaa pingaaruteqarpoq, tassami naalagaaffiup akiitsui qanoq amerlatigisinnaanersut naalagaaffillu aningaasanik qanoq amerlatigisunik attartorsinnaatiginersoq isumaqatigiissutigineqartariaqassammat.
Naalagaaffiullu akiitsui qummut killingat qaffanneqarsinnaanngippat, USA-p akiitsuni pillugit pisussaaffini naammassinngitsoorsinnaavai. taamatullu siornatigut pisoqarsimanngilaq.
Joe Bidenip USA-p naalagaaffiata akiitsuisa qummut killingat qaffakkusuppaa, naalakkersuisut politikkiat piviusunngortinneqarsinnaaniassammat, assersuutigalugu ilaqutariit coronavirusip tuniluutilertornerani aningaasallu naleerukkiartorneranni aningaasarsiornikkut eqqorneqarnerlussimasut inuussutissaqarsinnaaniassammata aningaasatigullu ikiorserneqarsinnaaniassammata.
USA-lli naalagaaffiata akiitsuisa qummut killingat republikanerit qaffakkusunngilaat, maanna naalakkersuisut politikkiisa piviusunngorsinnaanissaat killeqalerluni. Ikiorsiissutitut suliniutit akuerineqassappata, suliffeqarfiit amerlineqarnissaat republikanerit kissaatigaat.
Bidenilli piumasaqaata taanna akunnerup naanerani akueriumanngilluinnarpaa.
Naalagaaffiup akiitsui pillugit pisussaaffini naammassisinnaanngippagit tamanna kinguneqarnerlussinnaasoq, aningaasarsiornermik immikkut ilisimasallit aarlerisaarutigaat.
USA-p naalagaaffiata akiitsui pillugit isumaqatigiittoqarsinnaanngippat USA-mi naalakkersuisut innuttaasunut pisussaaffimminnik naammassinnissinnaanngitsut, USA-p præsidentiata illorsuanit siornatigut oqaatigineqarnikuuvoq.