USA-p Korea avannarliullu qanillattornerat Japanip nuannaarutigigaa

- Korea avannarliup allatut iliulernera atomimillu sakkussiaminik sakkuiarnissaq pillugu isumaqatigiinniarumalernera assut nuannaarutigaara, Shinzo Abe taama oqarpoq.
 
Korea kujalliup isumannaallisaanikkut siunnersortaanerata, Chung Eui-yongip, Amerikami nalunaaqutaq malillugu sisamanngormat unnukkut nalunaarutigaa Kim Jong-unip Donald Trump ataatsimiinnissamut qaaqqusimagaa.

Præsidentillu qaaqqusissummut akuersisimanera kingorna Præsidentip Illorsuanit uppernarsarneqarpoq. Qaqugorpiaq sumilu ataatsimiittoqassanersoq kingusinnerusukkut isumaqatigiissutigineqassasoq Præsidentip Illorsuanit oqaatigineqarpoq.

AAMMA ATUARUK Donald Trump Kim Jong-unilu naapittussanngortut

Shinzo Abep aamma oqaatigaa ataatsimiittoqartussanngornera "Japanip, USA-p Korea kujalliullu suleqatigiillutik Korea avannarlermut kimigiisertuarsimanerisa " kingunerigaa.
 
Japanimiut premierministeriata ilanngullugu oqaatigaa Donald Trump oqaloqatigisimallugu. Taakku Washingtonimi apriilip ingerlanerani naapissallutit isumaqatigiissimapput.