USA-p Kalaallit Nunaata ineriartortinneqarnissaanut aningaasaliinini 1,5 millionit dollarinik ilagai
USA-mi naalakkersuisut nunatsinni suleqatigiissutigineqartussat nukittorsarniarlugit 83 millionit koruuninik 2020-mi apriilimi aningaaaliipput, nunat marluk taakku suleqatigiinnerisa 2026-p tungaanut nukittorsarneqarnissaa siunertaalluni.
USA-mi naalakkersuisut siorna juulimi, suleqatigiissutissanut aningaasaliissutitik 65 millionit koruuninik ilavaat.
USA katillugit tassa 150 millionit koruuninik USAID aqqutigalugu nunatsinni suleqatigiissutissanut aningaasaliivoq.
AAMMA ATUARUK Nunarput USA-lu koruuninik millionilikkaanik nalilinnut suleqatigiissasut
Kalaallit Nunaata USA-llu sinniisuisa ataatsimiittartoqatigiinni Joint Committeemi USA-mi naalagaaffimmi Mainemi ataatsimiinnerisa nalaanni USA-p nunatsinnut aningaasaliissutini 1,5 millionit dollarinik, imaluunniit 11,3 millionit koruuninik ilavai.
Kalaallit Nunaata USA-llu akornanni niueqatigiinnissamut aporfiusinnaasut periarfissallu immikkut ukkataralugit Mainemi eqqartuiffigineqarput, pingaartumik Ukrainemi sorsuttoqarnera eqqarsaatigalugu isumannaatsumik pilersuisinnaanissaq eqqartorneqarpoq.
AAMMA ATUARUK USA nunarput suleqatigalugu millioninik arlalinnik aningaasaliiniartoq
Kalaallit Nunaata USA-llu sinniisuisa siorna isumaqatigiissusiartik aammaarlugu ukioq manna ataatsimiinnermi uppernarsarpaat. USA-p nukissiuutinut ataavartut ineriartortinnissaat pillugit siunnersortaanissamik tassani aamma piareersimavoq.
Amerikamiut kalaallillu ilinniartui pillugit paarlaasseqatigiittoqarnerusinnaanissaa isumaqatigiissummi aamma ilaatinneqarpoq, ilisimatusarnermi suleqatigiittoqarnerulissalluni, niueqatigiinnikkullu suleqatigiinnerup qulakkeerneqarnissaa ilaatigut aamma anguniagaalluni.
