USA millionilikkaanik nunatsinni ilinniartitsisunik ilinniartitseqqiinissamut tunissuteqartoq
Inuusuttavut suliffeqarfimmik nammineq pilersitserusuttut 3,3 millionit koruuninik tunissuteqarfigineqarput.
USA-mi naalagaaffiup nunani tamalaani sakkutuujunngitsut ineriartortitsinermi suliniutaannut aningaasaateqarfia, U.S. Agency for International Development (USAID), tunissuteqartuuvoq.
USAID-mi 450.000 dollarsinik, tassa 3,3 millionit koruuninik nunatsinni nutaaliorluni aallarnisaanermi suliniutinut aningaasaateqarfimmut, tassa Fonden for Entreprenørskab Kalaallit Nunaat-mut tunissuteqaqqammerpoq. Fonden for Entreprenørskab Kalaallit Nunaatalu aningaasat taakkua ingammik nunatsinni ilinniartitsisunik nutaaliorluni aallarnisaaneq pillugu ilinniartitseqqiinermut atussagai, aningaasaateqarfimmi tassani siulittaasoq Jacob Nitter Sørensen oqarpoq.
USA-p naalagaaffiata aningaasaateqarfia USAID nunatsinnut 12,1 millionit dollarsinik tunissuteqarniarluni 2020-mi nalunaarpoq.
Aningaasaateqarfik USAID nunani tamalaani sakkutuujunngitsut suliniutaannut tunissuteqartarpoq.
Naalakkersuisut USA-llu aallartitaa tamanna pillugu isumaqatigiissut 2021-mi atsiorpaat.
USA-lu tunissutiginiakkami ilaannit tassa 3,3 millionit koruuninik Fonden for Entreprenørskab Kalaallit Nunaannut tunissuteqarumaartoq, taamanikkut ilanngullugu nalunaarutigineqarpoq.
USAID-p aningaasanit nunatsinnut tunissutigisaminit katillutik 12,1 millionit dollarsiusunit 2026-p tungaanut ukiut tamaasa 2 millionit dollarsinik tunissuteqartassaaq.
- Aningaasat taakkua nunatsinni kinguaariit tulliuttut tatitunerulernissaannut suliniuteqalertornissatsinnut iluaqutaassapput, ingammillu nutaaliorluni aallartisaanermik Nuup avataani aamma atuartitsisalernissanut periarfissaqartitsinerulissapput.
- Suliniutaasussat meerartatta inuusuttortattalu amerlanerpaartaasa nutaaliorluni aallartisaaneq isumaliortaatsiminni pigiliussinissaannik kinguneqassasut neriuginarpoq, taanna oqarpoq.
AAMMA ATUARUK Nunarput USA-p millioninik aningaasaliinissaanut isumaqatigiissusiortoq
USA-mi naalagaaffik 80 millionit koruuninik nunatsinni sakkutuujunngitsut suliniutaannut tunissuteqarusulluni 2020-mi nalunaarpoq. Aningaasallu taakku taamanikkut naalakkersuisut qujaruppaat.
USA-lu tunissutiginiakkami ilaannit tassa 3,3 millionit koruuninik tunissuteqaqqammerpoq. Taamaaliussasorlu siorna nalunaarutigineqarpoq.
Inuusuttatta nunatta aningaasaqarnissaa qulakkiissagaat
Nutaaliorluni aallartisaaneq nunatsinni atuarfinni arlalinni atuartitsissutaalereerpoq. Nunattalu patajaannerusumik aningaasaqarnissaanut iluaqutaaniartussamik taama ilinniartitsineq nunatta sinneranut siammarteqqunartoq, Jacob Nitter Sørensen oqarpoq.
- Nunarput pikkorissorpassuarnik inoqarpoq, kinguaariillu tullii taakkutulli pikkoritsiginissaat pingaaruteqarpoq. Nunatsinni takornariaqarnermi aatsitassarsiornermilu imaannaanngitsunik unammilligassaqalertussaassapput, suliniutaasussallu nunatta inuinut tamanut iluaqutaasussamik meerartatta ineriartornerannut qularnanngitsumik iluaqutaassaqaat.
AAMMA ATUARUK Tusarfiit KNR-imut: USA nunatsinnut 82 millionit koruuninik tapiissuteqarniartoq
Ilinniartitsisunillu ilinniartitseqqiinerit siulliit ukiaq manna aallartissapput. Ilinniartitseqqiinermilu najoqqutassat, ilinniartitsisoqarneq allaffissornerlu Danmarkimi nutaaliorluni aallartisaanermi suliniutinut aningaasaateqarfimmit tassa Fonden for Entreprenørskab i Danmarkimit isumagineqassapput.
Fonden for Entreprenørskab Kalaallit Nunaat tamatumunnga tunngatillugu nunatsinni ilinniartitsisunik ilinniartitseqqiisussarsiuleruttorpoq.
Tamatumani 2024-mi aggustip tungaanut suleqatigiinnissartik nuannaarutigigitsik, USAID-mi ineriartortitsinermi siunnersortaaneq Elizabeth Feary oqarpoq.
- Fonden for Entreprenørskabilu suleqatigiinnitsigut Kalaallit Nunaanni isumallualersitsisumik ineriartortitsinermut siuarsaanermullu tapersersuinerput usorsisimaarutigaarput, aningaasaateqarfimmi taanna Kalaallit Nunaanni ilinniartitaanermi tatigeqatigiinnertalimmik attuumassuteqarluarmat. Aningaasat ineriartortitsinermi suliniuteqarnermut aallartinissarluarneqareersumut tunissutivut iluaqutaaqqunaqaat.
