- USA-mik suleqateqarnitta inerisaqqinneratigut kissaatigut pisariqartitagullu aallaavingalugit kalaallit inuiaqatigiit aningaasaqarnerlu periarfissanik pilersitsivoq, Pele Broberg tusagassiuutinut nalunaarummi oqarpoq.Assi: Naalakkersuisut

Nunarput USA-p millioninik aningaasaliinissaanut isumaqatigiissusiortoq

Amerikamiut ineriartortitsinermut suliffeqarfia USAID suliniutinut nunatsinnut iluaqutaasussanik 10 millionit dollarsinik aningaasaliivoq.

Nunarput USA-lu ukiuni tallimani atuuttussamik nutaamik ullumi isumaqatigiissusiorput, taamaalilluni nunat marluk akornanni suleqatigiinnerunernissamut ukiut tamaasa 2 millionit dollarsit qulakkeerneqarput. Ataatsimut katillugit 10 millionit dollarsit aningaasaliissutigineqarput. Aningaasat amerikamiut ineriartortitsinermut suliffeqarfianit USAID-imeersuupput.

Naalakkersuisut tusagassiuutinut nalunaarummi taama paasissutissiipput.

USAID-imi isumaqatigiissut Nunanut Allanut, Inuussutissarsiornermut, Niuernermut Silallu Pissusaanut Naalakkersuisup, Pele Brobergip amerikamiut naalakkersuisuisalu atsiorpaat. Tamanna Margot Ellisip USAID Europe & Euroasiami Actic Assistant Administratoriusup ullumi siusinnerusukkut ataatsimeeqatiginerani pivoq.

USA-mit ikiorsiissutit pingajuat piffissap sivikitsup ingerlanerani

USA-p nunatsinnik suleqateqarneranik pitsanngorsaanissamut marloriarluni aningaasaliinerata kinguneratigut isumaqatigiissuteqartoqarpoq.

USA pilersaarusianut siunertanullu nunatsinnik suleqateqarnermik pitsanngorsaatissanut siorna apriilimi 12,1 millionit dollarsinik aningaasaliissuteqarpoq.

AAMMA ATUARUK USA investerer nye millioner i samarbejdet med Grønland

Amerikamiut kongressiat suliniutinut amerikamiut kalaallillu ataqatigiinnerannut pitsanngorsaataasussanik aningaasaleeqqittut, amerikamiut Nuummi sinniisuata, Joanie Simonip KNR-imut ukioq manna juulimi oqaatigaa. Tassani 10,4 millionit dollarsit aningaasaliissutigineqarput. Amerikamiut naalakkersuisuini naalakkersuisoqarfiit assigiinngitsut aningaasanik aqutsisuusut suleqatigiinnermut 2021-mi aningaasaliissuteqarput.

Maannakkut nutaatut USAID 2026-p tungaanut ukiut tamaasa 2 millionit dollarsinik nunatsinnik suleqatiginninnerunissamut aningaasaliisassaaq. Tamanna nunanut allanut tunngasunut naalakkersuisup, Pele Brobergip nuannaarutigaa:

- USA-mik suleqateqarnitta inerisaqqinneratigut kissaatigut pisariaqartitagullu aallaavigalugit kalaallit inuiaqatigiit aningaasaqarnerlu periarfissanik pilersitsivoq. Nuannaarutigaaralu amerikamiut naalakkersuisuinik isumaqatigiissummik uannga isumaqatigiissuteqarnerput, alloriarnerusorlu Kalaallit Nunaata nunarsuarmut ammariartorneranut, Pele Brogerg tusagassiuutinut nalunaarummi oqarpoq.

AAMMA ATUARUK Gave fra USA: 450.000 dollar skal give dig gode idéer

USAID Fonden for Entreprenørskab Kalaallit Nunaannut 450.000 dollarsinik aningaasaliisoq ullumi saqqummiunneqarpoq. Tassanini nunatsinni ilinniarfeqarfinni meeqqat atuarfiinit ilinniarfinnut ingerlaqqiffiusunut pilersitsilluni aallarnisaanerup siammarternissaa suliarineqartarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl