USA-mit tunissut: 450.000 dollarsit pitsaasunik isumassarsitissavaatsit
USA-p nunattalu akornanni suleqatigiinneq nutaaq pilersinneqarpoq.
Fonden for Entreprenørskab Kalaallit Nunaat Amerikamiullu ineriartortitsinermut allaffeqarfia, USAID, aningaasatigut isumaqatigiissuteqarput.
USAID-ip nunatsinni ilinniarfeqarfinni, meeqqat atuarfiinit ilinniarfinnut ingerlaqqiffiusunut, pilersitsilluni aallarnisaanerup siammarterneqarnissaanut 450.000 dollarsit ukiuni marlunni tapiissutigissavai. Aningaasaateqarfik tusagassiuutinut nalunaarummi paasissutissiivoq.
Illuatungeriit isumaqatigiissut tallimanngornermi pisortatigoortumik atsioqatigiissutigissavaat.
AAMMA ATUARUK Aatsitassalerinermik Ilinniarfimmut 7.5 millioninik aningaasaliisoq
Jacob Nitter Sørensen aningaasaateqarfimmi siulittaasuuvoq, taassuma isumaqatigiissutip qulakkeernera nuannaarutigaa.
Aningaasat aningaasaateqarfiup ilinniarfeqarfinni tamani pilersitsilluni aallarnisaanermik ilinniartitsinermi ilaatitsinerulerniarnissaanut iluaqutaassapput.
- USAID-ip suleqatigilerneratigut suli siammasinnerusumik suliaqarsinnaalissaagut, tamannalu qilanaarutigingaatsiarpara, Jacob Nitter Sørensen tusagassiuutinut nalunaarummi ilaatigut allappoq, nangillunilu:
- Ilinniartitsisut atuartullu pilersitsilluni aallarnisaanermik sammisaqaraangamik soqutiginninnerat takullugu nuannertorujussuusarpoq. Sammisaq atuartunut ataasiakkaanut allanngueqataasarpoq, allanngueqataanerlu siunissami inuiaqatigiinnut suliffeqarfinnullu sunniuteqartussaavoq.
USA Kalaallit Nunaannut aningaasaliisoq
USA Kalaallit Nunaannut suleqatigiinnerulerumalluni marloriarluni aningaassaliissuteqarneranik tunngaveqarpoq.
USA siorna apriilimi 12,1 millionit dollarsinik Kalaallit Nunaannut suleqatigiinerulerumalluni suliniutinut aningaasaliivoq.
Taakku Amerikami universititenut marlunnut Aatsitassalerinermik ilinniarfimmut Sisimiuniittumut suliniutinut, suliniutimullu Arctic Education Alliance-mut aningaasaliissutigineqarput. Ilinniarfik kingulleq taaneqartoq nunatsinni silap pissusianik ilisimatusarfiuvoq, ilinniarfik nunatsinni Ilisimatusarfimmit akuuffigineqartoq suliniutinut paarlaasseqatigiiffiusartoq Amerikami ilisimatusarfiit ilaannit aqunneqartoq.
AAMMA ATUARUK USA nunarput suleqatigalugu millioninik arlalinnik aningaasaliiniartoq
Amerikap Kalaallit Nunaallu suleqatigiinnerunissamut suliniutinut, Amerikamiut kongresiata suliniutinut aningaasaleeqqissimasoq, Nuummi Amerikamiut konsuliat, Joanie Simon, juulimi KNR-imut oqarpoq. Tassa 10,4 millionit dollarsinik aningaasaliisoqarmat.