Ineriartorneq tamanna nutaaq iluaraarput, Amerikamiullu soqutiginninnerat takussaasunik kinguneqartinneqarnissaanut takusaqarnissatsinnut qilanaarpugut, Ane Lone Bagger oqarpoq.Assi: Ane Lone Bagger

USA-mut tigussaasumik isumaqatigiittoqanngitsoq

USA-mit atorfillit nuimasorpaaluit sapaatit akunnerata siuliani tikeraarput, tigussaasumilli isumaqatigiissusiortoqanngilaq.

Amerikamiulli Pituffimmiinnerannit nunatta annerusumik pissarsinerunissaa naalakkersuisut tikeraartunut annguppaat.

Naalakkersuisut tusagassiutinut taama nalunaaruteqarput.

Amerikamiut nunanut allanut tunngasunut ministereqarfiani qaffasinnerpaami atorfilik, Thomas Ulrich Brechbuhl amerikamiut illersornissamut ministereqarfianit amerikamilu sillimaniarnermut siunnersuisooqatigiivinit sinniisunik ilaqarluni nunatsinniittut, danskit nutaarsiassaqartitsiviata, Berlingskep sapaatip akunnerata siuliani allaaseraa.

AAMMA ATUARUK Tusagassiuutit: Pompeop bulldogia Trumpimit Kalaallit Nunaannukartinneqarpoq

Amerikamiut tikeraarneranni Naalakkersuisut aningaasaliisoqarnissaanut, suleqatigiinnissamut niuernissamullu periarfissanik saqqummiipput, angalanerli ilisimasassarsiornerummat aalajangersimasumik isumaqatigiissuteqartoqanngilaq:

- Siunnersorti Brechbuhl paasisaqangaarsimalluni angerlassasoq qanorlu ililluni Kalaallit Nunaata, Danmarkip USA-llu akornanni suleqatigiinnerup nukittorsarsinnaaneranut isumassarsianik tigussaasunik pilersitsissasoq qularutiginngilara, Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger oqarpoq.

Naalakkersuisullu Pituffimmi isumaqatigiissutit annaaneqartut pillugit amerikamiunut toqqaannartumik oqaloqateqarsinnaasimanerat erseqqissaatigaa:

- Naalakkersuisut Amerikamiut ataatsimeeqatigigaangamikkit, sutigut tamatigut, Amerikamiut Pituffimmi sakkutooqarfeqarnerat Kalaallit Nunaannut takussaasunik iluaqutissaqarnissaa pingaaruteqartoq erseqqissartarparput, pingaartumillu kiffartuussinissamik isumaqatigiissut. Tamanna siunnersortimut Brechbuhlimut aallartitaanullu oqaatigeqqipparput, Ane Lone Bagger oqarpoq.

AAMMA ATUARUK Ilisimatooq: Amerikamit aallartitat qaninnerusumik atassuteqaammik pilersitsissapput

Amerikamiut aallartitat tikeraarnerat amerikamiut nunatsinnut nuannareqqusaaleruttornerisa ilagaat.

Amerikamiut Danmarkimut aallartitaata, Carla Sandsip nunarput ukioq manna arlaleriarluni tikeraareerpaa, taannalu angalanermi matumani aamma peqataaqqippoq.

Ineriartornerlu taanna Naalakkersuisut nuannaarutigaat:

- Amerikamiut tungaanniit nunatsinnut soqutiginninneq annertusiartortoq ukioq manna takuarput, uatsinnillu suleqateqarnissaminnut piumassuseq takutippaat. Ineriartorneq tamanna nutaaq iluaraarput, Amerikamiullu soqutiginninnerat takussaasunik kinguneqartinneqarnissaanut takusaqarnissatsinnut qilanaarpugut, Ane Lone Bagger oqarpoq.

AAMMA ATUARUK Amerikamit aallartitat naalakkersuisorlu aatsitassat pillugit oqaloqatigiittut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat