Tusagassiuutit: Pompeop bulldogia Trumpimit Kalaallit Nunaannukartinneqarpoq
Amerikamiut Kalaallit Nunaannut qujageqqusaaleruttorput.
Danskit nunanut allanut tunngasunut ministeriata, Jeppe Kofodip (Soc) nunanut allanut tunngasunut naalakkersuisumik, Ane Lone Baggerimik (S) ataatsimeeqatiginnikkiartorluni Nuummiinnerani amerikamiut atorfilittaat Thomas Ulrich Brechbuhlimik ateqartoq aamma Nuummiippoq. Taassuma amerikamiut aallartitaqarfianit, Carla Sands sinniisullu amerikamiut illersornissamut ministereqarfianeersut USA-llu sillimaniarnermut siunnersuisooqatigiivineersut ilagai.
Berlingske taama allaaserisaqarpoq.
Thomas Ulrich Brechbuhl siammasissumik tamanit ilisimaneqanngilaq. Berlingskelli allaaserisaa naapertorlugu taanna tassaavoq Trumpip amerikamiullu nunanut allanut tunngasunut ministeriata, Mike Pompeop nunanut allanut tunngasunut politikkianik naammassinninnissamik isumagisaqartartoq.
AAMMA ATUARUK Ilisimatusartut ujartuisut: Kalaallit Nunaat Issittoq pillugu periusissiortariaqarpoq
- Kalaallit Nunaanni inuuniarnikkut ilinniartitaanikkullu unammillernartoqartoq soorunami ilisimavara, Danskit siulersuinerisa uagullu ataatsimooqatigiinnitta USA pissutsini taakkunani ikiuussinnaasunik isumalluutaateqartoq isumaqatigiissutigisinnaagipput isumaqarpunga, Brechbuhl Berlingskemut oqarpoq.
Qaffasissumillu atorfillip nunatsinniinnini amerikamiut nunarsuarmi qeqertat annersaannut soqutiginninneranik pissuteqartoq isertuutinngilaa:
- Kalaallit Nunaata issittullu isumannaatsuuginnarnissaanik, iluatsilluartuunissaanik Amerikallu avannaata ilaaniinnissaanik kissaateqarnitta erseqqissarnissaa uagutsinnut pingaaruteqarpoq. Nunat killiit naleqartitaat aallaavigalugit Kalaallit Nunaat isumannaatsuujuassasoq kissaatigaarput, Brechbuhl oqarpoq.
KNR-ip Thomas Ulrich Brechbuhl oqaaseqartinniarsarigaluarpaa, taannali oqaaseqarusunngilaq. Naalakkersuisoq Ane Lone Bagger aamma oqaaseqarusunngilaq.
