Ministeriuneq, Mette Frederiksen (Socialdemokratiet) New Yorkimut tikereernermini DR-imit TV2-miillu siullermeertumik apersorneqarpoq.

Taassuma Kalaallit Nunaata, Danmarkip USA-llu isumaqatigiissummik aqagu atsiornissaat naatsorsuutigalugu oqaatigaa.

Ministeriunerulli atsiortoqarnissaa qulakkeersinnaanagu oqaatigaa.

- Nunarsuarmi maani qulakkeerilluni oqartoqarsinnaava?, akissutissamik naatsorsuutigisaqarani aperivoq.

Jens-Frederik Nielsenip (D) ministeriunerup apersorneqarnerata kingunitsianngua facebookikkut allagaqarluni isumaqatigiissutip aqagu atsiorneqarnissaa allappaa.

- Kalaallit Nunaat, Danmark aamma USA isumaqatigiissutaat maani New Yorkimi aqagu atsiussavaat, Naalakkersuisut siulittaasuat allappoq.

- Atsioqatigiinneq piffissami unammillernartumi pivoq, innuttaasut amerlasuut ernumallutik ukiuni kingullerni pisut malinnaavigisimavaat.

Ministeriunerup naalakkersuisullu New Yorkimi Naalagaaffiit Peqatigiit illorsuani kalaallit nalunaaqutaat naapertorlugu 13.30 atsioqatigiittoqassasoq tusagassiuutinut nalunaarummi kingorna paasissutissiissutigaat.

Piginnittuuneq pillugu oqallinneq

Mette Frederiksen Amerikamiut præsidentiata, Donald Trumpip piginnittuunermik oqaluuserinnikkunnaarnissaa naatsorsuutigineraa aperineqarpoq.

- Qaammaterpassuarni sulissutigisarput isummaanissamut illersornissamullu politikki pillugu isumaqatigiissut inatsisitigut pituttuisuuvoq. Isumaqatigiissut nunat killiinut Natomilu iligiinnut tamanut pitsaasuuvoq.

- Isumaqatigiissuteqaraangatta suut atuuttussaanerannut tunngassuteqarpoq. Annerusumik oqaaseqarfigisinnaanngilarput, ministeriuneq oqarpoq.

Naalakkersuisut siulittaasuat Jens-Frederik Nielsen (D) aamma nunanut allanut, inuussutissarsiornermut aatsitassanullu naalakkersuisoq Múte B. Egede New Yorkimukarput. Uani sinniisoqarfiup pisortaanit, Jacob Isbosethsenimit tikilluaqquneqarput. Assi © : Naalakkersuisut

Mette Fredeirksenip Donald Trumpip aqagu ataatsimeeqatiginissaa qilanaaralugu Danmarks Radiomut TV2-mullu oqaatigaa.

- Aqagu ataatsimiinnissamut qilanaarpunga. Isumaqatigiissut Amerikamiut, kalaallit danskillu tungaannit naalagaaffeqatigiinnut pitsaasuuvoq. Issittumi sumiiffinnut pitsaasuunera Natomut aamma pitsaasuuvoq.

Namminersortuunermik tunniussaqanngitsoq

Donald Trumpip aamma Amerikamiut illersornissamut ministeriata, Pete Hegsethip Amerikamiut sakkutooqarnikkut Kalaallit Nunaanniinnerulernissaanut suliaq aallartinneqassasoq nalunaarutigaat.

Danmarks Radiop aamma TV2-p tamanna qanoq isumaqarnersoq Mette Frederiksenimut apeqqutigaat.

Ministeriunerup isumaqatigiissutigineqartussap imarisaa oqaaseqarfigiumanngilaa. Taassumali tamanna Issittumi isumannaatsuunerup pitsanngorsarneqarnissaa ataatsimut soqutigisarineqartoq oqaatigaa.

- Europamiut tungaanniit Amerikamiut najuunnissaat kissaatigaarput. Soqutigisarput ataasiinnaavoq, tassalu Atlantikumi illugiissumik ataatsimut suleqatigiinneq.

Namminersortuunermik tunniussaqartoqassanersoq, Mette Frederiksen aperineqarami tamanna isumaqatigiissutip ilaginngikkaa akivoq.

- Oqartussaaffimmik tunniussaqanngilagut. Danskit ministeriuneratut taama iliornavianngilanga. Tunngaviusumik inatsiserput malipparput. Namminersortumik oqartussaaneq attatiinnarlugu nunat allat pitsaanerusumik suleqatigineqarsinnaapput.

Tamanut qujassuteqartoq

Ministeriuneq isumaqatigiissut naammassineqartoq ilisimatinneqarami qanoq eqqarsarnersoq aperineqarpoq.

Akissutini illalaarluni aallartippaa, kingornalu oqarluni:

- Isumaqatigiissutip imaata naammassiartornerat nuannaarutigaara.

Mette Frederiksen tamatuma kingorna isumaqatigiissummik pilersitsinermut peqataasunut tamanut qujassuteqarpoq:

- Ullormiit ullormut isumaqatigiissutaanngilaq. Kalaallit Nunaannut tunngasoq sivisuumik suliaraarput. Atorfilittanut qujanaq. Tamanut takuneqarsinnaanngitsumik suliaqartoqangaatsiarnikuuvoq. Suliarujussuuvoq.

- Folketingimut aamma qujassuteqarniarpunga. Illuatungiliuttunit suleqataalluartoqangaatsiarpoq.

Ministeriuneq naggasiutigalugu Europamiunut suleqatigisanut aamma qujassuteqarpoq.

- Inuppassuit angusaqaqataaffigaat. Qutsavigisassarpassuupput.