USA-mut isumaqatigiissuteqartoqarnerata kingorna Amerikamiut Narsarsuarmi sakkutooqarfeqalernissaat ernumassutigineqaleriartortoq

USA Kalaallit Nunaata illersorneqarneranik pisariaqartunik tamanik tamakkiisumik aqutsilissasoq, Amerikamiut præsidentiata, Donald Trumpip Truth Socialikkut tallimanngornermi unnukkut allappaa.

Nunatta, USA-p Danmarkillu akornanni isumaqatigiissut nutaaq naalakkersuisunit danskillu naalakkersuisuinit kingorna uppernarsarneqarpoq.

Isumaqatigiissut sapaatip akunnerata tulliani aatsaat atsiorneqartussaammat isumaqatigiissutip qanoq isumaqarnera illuatungeriinnit arlaannaanit annerusumik oqaaseqarfigiumaneqanngilaq, nunanulli allanut naalakkersuisup, Múte B. Egedep (IA) isumaqatigiissutip nunatta illersornissamut isumannaallisaanermut suleqatigiinnissamut piareersimanera ersersikkaa KNR-imut oqaatigaa.

Isumaqatigiissut nutaaq Amerikamiut nunaqarfimmi sakkutooqarfeqalernissaanik ilaqarnersoq Narsarsuarmi ernumassutigineqarpoq.

- Amerikamiut Narsarsuarmik soqutiginnillutik siusinnerusukkut oqaatigaat, Ole Guldager Narsarsuarmut 1970-ikkunnili tikittartoq katersugaasivianillu ullumikkut aqutsisoq oqarpoq: 

- Tamatuma saniatigut angutit sisamat US Navymeersut angalaarlutik uuttortaallutillu misissuipput.

Ole Guldagerip Narsarsuarmi katersugaasivik ullumikkut ingerlataraa. Taassuma Natop Arctic Shieldimik taaguuteqartumik septembarimi sungiusarnerani nunaqarfimmi pisoqaalussimasoq oqaatigaa. Assi © : Emil Weis / KNR

Amerikamiut nunatsinni amerlanerusunik sakkutooqarfeqalissanersut taakkulu sumiissanersut suli isumaliutersuutigineqarpoq, Amerikamiulli ‘Kalaallit Nunaanni sumiiffinni naleqquttuni, periarfissarpassuaqarfiusumilu sakkutooqarnikkut najuunnerulernissaanut suliaq erngertumik aallartissagaat’, Donald Trumpip Truth Socialikkut allappaa.

- Amerikamiut Narsarsuarmut uteqqinnissaminnik soqutiginnillutik nalunaaruteqarnissaanut takussutissarpassuaqarpoq, Ole Guldager oqarpoq: 

- Isumaqatigiissummut uunga qanoq isumaqatiginninniartoqarsimanersoq ilisimanngilarput, taamaammat siunissarput pillugu qularnerujussuarmiilerseqqinneqarpugut.

Amerikamiut sakkutuuisa Narsarsuarmiinnerat

Amerikamiut sakkutuuini qaffasissumik atorfillit nunaqarfimmik misissuiartorlutik Narsarsuarmiittut aasannginnerani saqqummiunneqarpoq.

Nunanut allanut Naalakkersuisoqarfiup Kunngeqarfiup iligisanik qanimut suleqateqarlutik isumannaallisaanermik pitsanngorsaarusunneranut atatillugu sumiiffinnik misissuisoqartoq taamani oqaatigaa.

KNR-ip Narsarsuaq juulimi tikeraarpaa. Najukkamiittullu nunaqarfik Amerikamiunut sakkutooqarfinngortinneqassappat matuneqarnissaa ernumassutigalugu oqaatigaat.

Danskilli najuunnerulernissaat imaluunniit sakkutooqarfeqalernissaa nunaqarfimmut uummaarissititsisinnaalluni.

- Amerikamiut maani sakkutooqarfiliussagaluarpata uagutsinnut, maani najugaqartunut qanoq piumasaqaateqartoqassanersoq apeqqutaasorujussuuvoq, Piumasaqaatit ima annertutigilersinnaapput uagut angerlarsimaffipput qimattariaqalissallugu, Storch Lund ukiorpassuarni mekanikeritut sulisimasoq mittarfimmilu aqutsisuusimasoq oqarpoq.

Sakkutuut septembarimi sungiusarnerat – Arctic Shieldimik taaguuteqartoq – septembarimi aaqqissuunneqarpoq, tassani Natomi nunanit aqqanilinnit sakkutuut 400-t sinneqartut peqataapput.

Sungiusarneq tamanna KNR-ip juulimili saqqummiuppaa.

- Maani najugaqartuusugut Amerikamiut eqqarsaatigivallaarunnaarunaraluarpagut, sungiusarnermi nutaaq pissutigalugu danskit Natoluunniit maani sakkutooqarfeqalersinnaanerat eqqarsaatigigatsigu, kisianni pissutsit allanngorujussuaqqipput, Ole Guldager oqarpoq.

Naalli USA sungiusarnermi peqataanngikkaluarluni Narsarsuarmeeqataavoq. DR-ip saqqummiussaa naapertorlugu sakkutuut ingeniørit immikkut ilinniarsimasut Naval Construction Forcemeersut teknikkikkut pissutsinik tassani misissuipput.

- Timmisartup mittarfia soqutigaat. Mittarfiup pitsanngorsarnissaanut iluarsaannissaanullu qanoq iliortoqarnissaa misissorpaat, Ole Guldager oqarpoq.

Taassuma Amerikamiut sisamat suli Narsarsuarmiinnerat oqaatigaa.

Siunissap ernumassutiginera

Ole Guldagerip nunaqarfiup suneqarnissaa najugaqartullu najugaqaannarsinnaassanersut  Narsarsuarmiunut pingaarnerpaasoq erseqqissarpaa.

- Uagutsinnut maani eqqissisimasumik najugaqaannarsinnaanersugut imaluunniit sumiiffimmit qimaguteqquneqassanersugut tunnganerpaagunarpoq, Ole Guldager oqarpoq.

Taanna katersugaasiviup ammanissaanut piffissaq naagaangat angerlarfigisartakkaminik Danmarkimi nammineq illoqarpoq.

- Kisianni pisoqaqqilissappat taava uteqqittariaqassaanga, Ole Guldager oqarpoq.

KNR-ip Amerikamiut sakkutuui Narsarsuarmi sulerinersut, Nunanut allanut Naalakkersuisoqarfimmut ataasinngormat apeqqutigaa.

- Kunngeqarfiup Kalaallit Nunaanni eqqaanilu isumannaallisaanermut pitsanngorsaaniarneranut sungiusartoqarnissaanullu atatillugu iligisat, ilaatigut U.S. NORTHCOM peqatigalugit sumiiffinnik ingerlaavartumik misissuisoqarpoq, Nunanut allanut Naalakkersuisoqarfik akivoq.