Isumasioqatigiinnerup kingorna: USA-mut isumaqatigiinniarnermi Pituffik Kangerlussuarlu imminnut atatinneqartut
Nunanut allanut tunngasunut ministeri Anders Samuelsen (LA) naalagaaffeqatigiit USA-mik ilaatigut Pituffik pillugu oqaloqateqarnerannik nassuiaatinneqarpoq.
Isumasioqatigiinneq matoqqasumik ingerlanneqarmat politikerit ataatsimiinnermi oqaluuserineqartunik saqqummiusseqqusaanngillat.
AAMMA ATUARUK Pituffik pillugu aaqqiissuteqarallartoqassanngitsoq
Ataatsimiititaliamili siulittaasup Aleqa Hammondip (NQ) siulittaasullu tulliata Aaja Chemnitz Larsenip (IA) ataatsimiinnerup kingorna ilisimatitsissutigaat illersornissamut ministeri Claus Hjort Frederiksen Kangerlussuarmi mittarfik pillugu isumasioqatigiinnissamut ataatsimiititaliamit aggersarneqassasoq.
KNR-illu paasisai naapertorlugit mittarfissuup siunissaa Pituffimmi kiffartuussinissamik isumaqatigiissutip isumaqatigiinniutigineqarneranut suli naammassineqanngitsumut taamaalilluni toqqaannartumik toqqaannanngikkaluartumilluunniit ilanngutsinneqarpoq.
- Paasisakka malillugit isumaqatigiinniartoqarpoq, Aaja Chemnitz Larsen oqarpoq.
Løkke: USA-p mittarfinnut soqutiginninnera Pituffiup perulluliuutaaneranut tunngatillugu isigineqassaaq
Pituffimmi kiffartuussinissamik isumaqatigiissutip suliarimannittussarsiuunneqarmat qangaaniilli isumaqatigiissutaasoq uniorlugu Amerikamiut ingerlatseqatigiiffiat isumaqatigiissuteqarfigineqarpoq, nunattalu Danmarkillu USA 2014-imiilli isumaqatigiinniarfigilerpaat.
Pilersaarutillu malillugit nunatta suliarimannittussarsiuussinerup kingunerisaanik aningaasatigut taartisiaqartinnissaa isumaqatigiinniarnerni anguniarneqarpoq, tamatumunngalu peqatigitillugu USA-p sakkutooqarfianut tunngatillugu siunissami suliariumannittussarsiuussimnernut nutaanik malittarisassiortoqassanersoq aalajangiiffigineqassalluni.
Isumaqatigiinniarnerilli tusagaqarfigineqarpianngillat.
Taamaattorli USA-mit siorna nalunaarutigineqarpoq nunatsinni mittarfinnut aningaasalersuinissaq soqutigineqartoq, mittarfiit sakkutuujungitsunit sakkutooqarnikkullu atorneqarsinnaassappata. USA-lli sumi qanorlu annertutigisumik aningaasaliiniarnersoq suli ilisimaneqanngilaq.
Ministeriunerulli Lars Løkke Rasmussenip upernaaq manna oqaatigaa USA-p mittarfinnut aningaasaleerusunnerminik nalunaaruteqarnera Kunngeqarfiup Danmarkip Pituffiup isumaqatigiinniutigineqarnerani USA-mut tatisineranut atassuteqartut isigalugu.
- Isumaqarpunga taamatut inissisimasoqarnera Amerikamiut pimoorussinerulernissaannut Kim Kielsenimik suleqateqarluarnikkut atorsinnaasimallugu. Taamaammat assersuutigalugu Amerikamiut Kalaallit Nunaanni aningaasaleerusullutik nalunaaruteqarnerat tamatumunnga takussutissatut isigivara, ministeriuneq oqarpoq.
Ministeriunerullu Lars Løkke Rasmussenip apersorneqarnermini tassani ilisimatitsissutigaa Kangerlussuarmi Mittarfiup siunissami atorneqarnissaa Danmarkimi illersornissaqarfiup USA-llu soqutigigaat.
AAMMA ATUARUK Amerikamiut Kangerlussuarmut missinnaanissaq pisariaqartippaat
Mittarfiulli nutarsarneqarnissaa millionerpassuarnik naleqassaaq.
Tamatuma saniatigut
- USA-p nalunaaruteqarneranut tunngatillugu paasisaqarneruvugut, qanorpiarli aaqqiissuteqassanersoq paasinngilarput. Aamma isumaqarpunga ersarissumik aaqqiissuteqartoqarnissaa suli ungasittoq, Inuit Ataqatigiinneersoq Aaja Chemnitz Larsen oqarpoq.
AAMMA ATUARUK USA-p nunatsinni sunik suliaqarnera nunatta ilisimasariaqarpaa
