Assi: KNR

Løkke Rasmussen: Amerikamiut Kangerlussuarmut missinnaanissaq pisariaqartippaat

USA-p Nunatsinniinnissani suli pisariaqartippaa aamma Pituffiup avataani. Lars Løkke Rasmussen KNR-imit apersorneqarnermini taama oqarpoq.

Illersornissaqarfiup Kangerlussuup mittarfianik atuisinnaaginnarnissani kissaatigigaa danskit naalakkersuisuisa sapaatip akunnerata siuliani sisamanngornermi nalunaarutigaat.

Lars Løkke Rasmussenillu (V) apersorneqarnermini, Illersornissaqarfiullu nalunaaruteqarnera sioqqullugu pisumi, danskit amerikamiullu sakkutuuisa timmisartui Kangerlussuarmut ukioq naallugu missinnaaginnarnissaat pisariaqartinneqartoq oqaatiginikuuaa.

- Kalaallit Nunaannut oqartussaanerup illersornissaa oqaluuseerigutsigu, taava tassunga missinnaanissaq - amerikamiullu ukioq naallugu missinnaanissaat - qitiuvoq.

AAMMA ATUARUK Illersornissaqarfik Kangerlussuarmisitsiinnarusuppoq

Ministeriunerup Ilulissani Nuummilu silap allanngujanerunera  pissutigalugu, tamanna taakkunani periarfissaanngitsoq erseqqissaatigaa.
Illuatungaanilu Kangerlussuarmi timmisartornikkut pissutsit aalajaannerungaarput, tamannarpiarlu pissutigalugu USA-p mittarfiup Kangerlussuarmiinnissaa Sorsunnersuup Aappaani toqqarpaa.

- Kangerlussuaq atatiinnarneqartariaqarsinnaavoq, aamma danskit sakkutuuisa atortarmassuk. Ilulissanimi - mittarfik qanorluunniit pitsaatigileraluarpat, ukioq naallugu, ulluni 365-ini mittoqarsinnaanissaa qulakkeerneqarsinnaanngilaq, Lars Løkke Rasmussen KNR-imut oqarpoq.

Taassuma USA-p Kalaallit Nunaanni mittarfinnut tunngatillugu inissisimanera ‘sakkutooqarnermut tunngasunik suliaqartuni’ ingammik oqallinnerusoq erseqqissaatigaa.

Mette Frederiksenip USA-p Nunatsinniinnera siulittorsinnaanngikkaa

Suleqatigiissitanik Illersornissaqarfiup Kangerlussuarmiiginnarnissaanut periarfissaanik kingunerisassaanillu naliliisussanik maannamut pilersitsisoqarnikuuvoq. Naalakkersuisut Illersornissamullu ministereqarfik suleqatigiissitani ilaatitaqassapput.

AAMMA ATUARUK NATO-p Kangerlussuami mittarfik atorluartarpaa

Ministeriuninngornissamut unammillerti Socialdemokraatit siulittaasuat, Mette Frederiksen, amerikamiut Nunatsinni siunissami sumiissanerat pillugu aalajangereersinnaanani, KNR-imut oqarpoq.

Danskilli nunanut allanut tunngasunut sillimaniarnermullu politikkiata Kalaallit Nunaannut attuumassuteqartortaa tamarmi Namminersorlutik Oqartussanik qanimut oqaloqatigiissutigineqartassasoq erseqqissaatigaa.

- Nunanut allanut tunngasunut sillimaniarnermullu politikkip qanoq ineriartorumaarnissaa isummerfigereerneqarsinnaanngissoraara, Mette Frederiksen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat