NATO-p Kangerlussuami mittarfik atorluartarpaa

Nalunaarusiami Rambøllimit suliarineqartumi Naalakkersuisunit suliakkiutigineqartumi, tamanna atuarneqarsinnaavoq. 
Sakkutuut timmisartui 2016-mi Kangerlussuarmut 533-eriarlutik nunnillutilluunniit tigipput.

Taakkunani amerikamiut sakkutuuisa timmisartui amerlanerulaartut Kangerlussuup siunissami periarfissai pillugit nalunaarusiami, Ineqarnermut Attaveqaqatigiinnermullu Naalakkersuisoqarfimmit suliakkiunneqarsimasumi, atuarneqarsinnavoq. 

Kangerlussuarmi mittarfik, ukioq 2016-mi sakkutuut timmisartuinit timmisartunillu ilaasunit angallassisunit amerlaqatigiingajattut kisitsisini takuneqarsinnavoq. 

Millionilikkaanik iluanaarutaavoq

Amerikamiut danskillu illersornissaqarfiisa nunatsinni timmisartunut nunani tamalaaneersunut miffigineqarsinnaasut pisariaqartikkaat kisitsisit takutippaat.

Kangerlussuup mittarfia danskit illersornissakkut suliaqarneranut ammatinneqassasoq, Mittarfeqarfiit aamma Namminersornerullutik Oqartussaasimasut 2001-mi isumaqatigiissutaat taama allassimavoq.

AAMMA ATUARUK Kangerlussuup mittarfiata siunissaa pillugu USA oqaasissaqartitaasoq

Taannalu nunatta karsianut Mittarfeqarfinnullu danskit naalagaaffianit ukiumut 6,4 millionit koruuninik pissarsisarpoq. Isumaqatigiissullu sivitsorneqarsinnaasoq nalunaarusiami atuarneqarsinnaavoq.

Kangerlussuup mittarfia 1.199 meterinut naalineqarpat, danskit amerikamiullu illersorneqarfiisa Nuummi Ilulissaniluunniit mittarfiit atortariaqalissagaat nalunaarusiami aamma tikkuarneqarpoq.

Nuummi Ilulissanilu mittarfissualiornissamut danskit naalagaaffiat aningaasaleeqataaniarluni nalunaarutigereeraalu, Amerika nunatsinni mittarfinnik allerinissaq tapersersorlugu aamma piareersimanerarnikuuvoq.
 

AAMMA ATUARUK Amerikamut isumaqatigiissut annertoorujussuarmik iluaqutissiissooq