Motzfeldt: Amerikamut isumaqatigiissut annertoorujussuarmik iluaqutissiissooq
- Illersornissamut isumaqatigiissut nunatsinni annertunerusumik iluaqutissarsiffigisimanngisarput kiisami massakkut ilaqutissarsiffiginissaanut takussutissat ilusinikkiartorneri taanna isumaqarpunga tamatsinnut nuannaarutissaasoq, Vivian Motzfeldt taama oqarpoq.
USA-p Nunat Killiit Illersoqatigiiffiallu atlantikup avannaani piginnaassusiisa nukittorsarneqarnissaat, taamatullu USA-p, danskit kunngeqarfiata nunatsinnilu innuttaasut iluaquserneqarnissaat aningaasaliinermi siunertaassasut, Amerikamiut illersornissamut ministereqarfiat anguniagassatut nalunaarummi allappoq.
Amerikamiulli mittarfinnut sorlernut aningaasalersuinissaminnik soqutiginninnerat, aningaasallu qanoq amerlatigisut pineqarnersut allaqqanngilaq.
AAMMA ATUARUK USA-p nunatsinni mittarfinnut aningaasalersuinissamut periarfissat misissorniarai
Tamannalu nunanut allanut naalakkersuisup maanna oqaatigisinnaanngilaa.
-Nunatta iluaqutigisassaanik aammalu Amerikamiut iluaqutigisassaanik mittarfinnik takorluuisoqarpoq atortulersuutitigut pitsanngorsaatinik aningaasaleerusunnermik immaqaluunniit mittarfiit ilaannik tallisariaqarsorisatut isigisaminnik tallilerinerannik, Vivian Motzfeldt oqarpoq.
Statsministerip, Lars Løkke Rasmussenip, Danmarkip nunatsinni mittarfinnut 1,6 milliardit koruuninik aningaasaleeqataasinnaanera pillugu Nuummi isumaqatigiissuteqarneranit sapaatit akunnerat qaangiutiinnartoq taama nalunaaruteqartoqarpoq.
Anguniagassatut maannamut nalunaaruteqartoqaannaraluartoq, Amerikamiut isumaqatigiissummi ilaatinneqarnissaata iluaqutissaanissaa Vivian Motzfeldtip qularinngilaa.
- Soorunami nunatsinnut annertoorujussuarmik iluaqutissiissooq. Silaannaq nalunngilarput nunatsinni allanngorartorujussuusartoq aammalu silaannakkut angallannikkut ilaatigut atortulersuutit amigarneri apeqqutaallutik kinguaattoornerit immaqaluunniit silamik peqquteqarlutik uninngasarneri taakkua aamma millisinneqarujussuassammata taamatut siunnerfeqarnermi, Vivian Motzfeldt KNR-imut taama oqarpoq.
AAMMA ATUARUK IAs lufthavnspakke skader udviklingen i samfundet
