Illersornissaqarfik Kangerlussuarmisitsiinnarusuppoq
Illersornissaqarfiup Kangerlussuarmiiginnarnissaq maannakkut kissaatigigaa, Danmarkip illersornissamut ministeriata, Claus Hjort Frederiksenip, nunanut allanut tungasunut naalakkersuisoq, Ane Lone Bagger, ilisimatippaa.
Namminersorlutik Oqartussat tusagassiutinut taama nalunaarput.
Tusagassiutinut nalunaarut naatsoq naapertorlugu Illersornissaqarfiup kissaataa "silamut tunngasunik, timmisartunik Illersornissaqarfiup atugaanik suliassanillu suliarinninnissamik" tunngaveqarpoq.
- Tassunga tunngatillugu Naalakkersuisut Illersornissamullu ministeri suleqatigiisitamik pilersitsissallutik aalajangiuppaat, tassani Illersornissaqarfiup siunissami Kangerlussuarmiiginnarnissaanut aporfiusinnaasut iluaqutaasinnaasullu qulaajarneqassallutik, Namminersorlutik Oqartussat allapput.
Suleqatigiititat suliatik 2019-ip aasaani naammassissavaat.
Nunat allanut tunngasunut naalakkersuisoqarfik KNR-imut ilisimatitsivoq, suleqatigisitanut suliakkiutissamik maanna oqaasertalersuineq aallartissasoq. Suleqatigiititaq aallartitsinnagu, suliakkiutip oqaasertai Naalakkersuisunit Illersornissamullu miniseqarfimmit akuerineqaqqaassapput.
Kangerlussuaq nunatta mittarfeqarnerata qanoq isikkoqarnissaanik, Nuummi Ilulissanilu mittarfiit tallinissaannik ilaqartumik, oqallinnermi qitioqaaq.
Tassami Nuummi Ilulissanilu mittarfiit tallisat Kangerlussuup atlantikoq ikaarlugu timmisartornermi mittarfittut nunatsinnullu isaariatut atuuffia taarsissavaat. Tamaalippallu nunaqarfiup pisariaqartitaanera millissaaq.
Kangerluarmi mittarfiup sakkutuunit atugaanera mittarfiliortiternissamut tunngatillugu allaaserineqarnikuuvoq.
Nalunaarusiami ilaatigut atuarneqarsinaavoq, sakkutuut timmisartui USA-meersut 2016-imi 278-eriarlutik millutilluunniit tingisimasut.
Sakkutuut illersornissaqarfiat ulapinnginnerulaarluni, taassuma timmisartui Kangerluassuarmut 255-eriarlutik minngikkunik tingipput. Taakkualu katikkaanni – NATO-meersut timmisartuinit iliuutsit 533-iullutik.
