Hammond: USA-p nunatsinni sunik suliaqarnera nunatta ilisimasariaqarpaa
Aleqa Hammondip statsministeri Altinget: Arktisimi oqallissaarummi isornartorsiorpaa.
Pituffiup nunat Issittumi pissaanilissuit akornanni anneruniuttoqarnerani inissisimanera pillugu Aleqa Hammondip statsministerip apeqqarissaarnermi sukumiinerusumik akissuteqannginnera, Aleqa Hammondip isornartorsiorpaa.
- Nunatsinni qanoq pisoqarnera pillugu ilisimatinneqartarnissarput, Nunatta Qitornaannit pingaartitaraarput, nunallu allat nunatsinni sakkutooqarfeqarnermi siunissami qanoq pilersaaruteqarnersut pillugu ilisimatinneqartarnissarput pingaaruteqarluni, Aleqa Hammond oqallissaarummi oqarpoq.
AAMMA ATUARUK Pituffik russinut isumannaallisaataavoq
USA-p nunatsinni isertortumik siornatigut suliarisarsimasai taassuma innersuussutigai, Camp Century atomimillu qaartartorsuarnik isertortumik eqqussisoqarsimanera taakkununnga ilaallutik.
Nunatsinni mittarfinnik atuisinnaassaguni Kalaallit Nunaanni mittarfiliortiternernut aningaasaleeqataanissamut piareeqqanini, USA-p siorna nalunaarutigaa.
Nunat killiit Issittumi sakkutuuliinerat Ruslandimit ernummatigineqartoq, Illersornissaqarfiup isertortumik paasiniaasartut FE-meersut oqaatigaat.
AAMMA ATUARUK Issittumi suleqatigiinneq sakkutuunik amerlisaanermit aporfilersugaasoq
Kalaallit Nunaat USA-p mittarfiliortiternernut aningaasaleeqataaniarneranut akuersissappat, USA-p Ruslandillu Issittumi anneruniutilernerunissaanik kinguneqarsinnaanissaa Aleqa Hammondip ernummatigaa, Kalaallit Nunaannut tamanna kingunipiloqarsinnaasoq oqaatigalugu.
USA-p Kalaallit Nunaanni suliarisai suunerannik Danmarkip Kalaallit Nunaannut ilisimatitsisarnissaa taamaammat pingaaruteqartoq, Aleqa Hammondip oqaatigaa.
- Nunatta illersornissakkut annertusaaffigineqarnera nunatsinnit minnerpaamilluunniit sunniuteqaqataaffigineqassappat,
USA-mik ikinnguteqarnitsinnut illersuisoqarnitsinnullu qujasariaqarnitsinnik Danmark oqaannassappat naammanngilaq, Aleqa Hammond Altinget: Arktisimi allaaserisami ilaatigut oqarpoq.
AAMMA ATUARUK PET Nunatsinni immikkoortortaqarfeqalersoq