USA-mi naalagaaffinni assigiinngitsuni kaassaartoqarlunilu silapilummat inuit 15-init ikinnerunngitsut ajunaartut
USA-mi naalagaaffinni assigiinngitsuni kaassaartoqarlunilu silapilummat inuit 15-init ikinnerunngitsut ajunaarput, naalagaaffiit Texas, Arkansas Oklahomalu taakkununnga ilaapput.
Tamaani oqartussat sapaammi taama ilisimatitsipput.
Annaassiniartartut suliuarsinnarput. Nutaarsiassaqartitsivik Ritzau taama allaaserisaqarpoq.
Inuit 100.000-likkuutaat arfininngormalli innaallaagiaarussimapput, USA-p qiterpasissuata kujasissuani Southern Plainsimi sapaatit akunnerata naanerani anorersuarlunilu sialussuarmat. Texasip qiterpasissua avannarpasissualu tassunga ilaavoq.
Texasimi illoqarfissuarmit Dallasimit avannamut kaassaarmat inuit arfineq-marluk ajunaartut, tamaani politiit ittuisa ilaata tusagassiortunik katersortitsinermi oqaatigaa.
Texasip guvernøriata Gregg Abbottip Texasimi nunap immikkoortuinut sisamanut peqqussut immikkut atuuttussaq ilanngullugu atsiorpaa.
Annaassiniarnermi misissuinernullu aningaasartuutissat taamaasillutik matussuserneqarsinnaalissapput, annaassiniarnermilu sulisussanik amerlanerusunik pissarsiniartoqarsinnaalissalluni. Inuit silapilunnerani eqqorneqarsimasut peqqussutip atsiorneqarneratigut ikiorneqarsinnaalissapput.
Kaassaarmat illut benziinamillu orsersortarfik aserorneqarput, biilillu aamma aserorneqarlutik.
Arkansasimi inuit tallimanit ikinnerunngitsut anorersuarnerani ajunaarput. Arkansasimi oqartussat tamanna sapaammi uppernarsarpaat. Nutaarsiassaqartitsivik ABC taama allaaserisaqarpoq.
Oklahomami inuit marlunnit ikinnerunngitsut ajunaarput, naalagaaffimmilu Kentuckymi illoqarfimmi Louisvillemi inuk ataaseq ajunaarluni.