USA-mi miniteriusimasoq: Trumpip USA-p tunngaviusumik inatsisaa avaqqutaarpallaarpaa
USA-p nunanut allanut tunngasunut ministererisimasaa Colin Powell isumaqarpoq, USA-p præsidentiata Donald Trumpip USA-p tunngaviusumik inatsisaa avaqqutaarpallaaraa.
Republikanerit sinnerlugit ministeriusimasoq CNN-imi aallakaatitami "State of the Union"-imi taama oqarpoq.
Taartumik amillip George Floydip politiinit toqutaanerata kingorna akerliussutsimik takutitsinerpassuit pillugit Trumpip iliuuserisai Colin Powellip assuarai.
AAMMA ATUARUK USA-p illersornissamut ministeriata Trumpip sakkutuulersuinissamut siunnersuutaa tapersinngikkaa
Donald Trumpip unammillertaanik Joe Bidenimik, demokratineersumik, qinersiniarnini taassuma saniatigut oqaatigaa.
- Tunngaviusumik inatsiseqarpugut. Tunngaviusumillu inatsit malittussaavarput. Præsidentillu inatsit avaqqutaarpaa, Colin Powell oqarpoq. Powell sakkutuunut naalagaanikuuvoq, republikanerillu sinnerlugit præsidentiusup George W. Buship præsidentiunerani ministeriulluni.
Donald Trumpillu Colin Powell Twitterikkut akissuteqarfigaa:
- Inummik uteriitsumik, Joe Bidenimik, qinersiniarnini, Colin Powellip, angutip aamma uteriitsup, Kangia Qiterlermilu sorsunnernut ilanngutsitsisup nalunaarutigeqqammerpaa, Trump Twitterikkut taama ilaatigut allappoq.
AAMMA ATUARUK Joe Biden præsidentinngorniunnissamut sassartussanngorpasilertoq
Colin Powell nunatsinnut 2004-mi tikeraarpoq, Joset Tuusi Motzfeldt Igalikumi isumaqatigiissummik atsioqatigalugu.