Joe Biden præsidentinngorniunnissamut sassartussanngorpasilertoq
USA-mi præsidentimut tullersortaasimasoq, Joe Biden, demokraatit præsidentinngorniunnissamut sassartitassaannik naalagaaffiit ilaanni arfineq-marlunni marlunngormat qinersinerni tamani ajugaasussanngorpasippoq.
AAMMA ATUARUK Biden Ohiomi allakkatigut qinersinermi ajugaasoq
Nutaarsiassaqartitsiviup AP-ip USA-milu tusagassiorfiup NBC Newsip missingersuutaasa tamanna takutippaat.
Ajugaassaguni Bidenip demokraatit sinnerlugit præsidentinngorniunnissamut pisortatigoortumik sassarnissaminut sinniisunit 1991-init tapersersorneqartussanngungajalissasoq, AP allappoq.
Georgiami West Virginiamilu sapaatit akunnerata tulliani qinersinermi naammattunit tapersersorneqalersinnaassasoq, AP allappoq.
Joe Biden novembarimi præsidentinngorniunnissamut sassartussatut demokraatini qineqqusaartutuaavoq.
Bernie Sanders Bidenip unammillertaani kingulliusoq demokraatinit sassartussatut qineqqusaarnermit apriilip arfineq-pingajuanni tunuarpoq, præsidentimullu tullersortaasimasumut tapersersuilerluni.
AAMMA ATUARUK Bernie Sandersip Joe Biden præsidentimut qinersinissamut tapersersoraa
Sandersilli demokraatit politikkiannut sapinngisamik sunniuteqarnissani anguniarlugu sinniisunit partiip juulimi ataatsimeersuarnissaani tapersersorneqarniarluni suli qinerneqarsinnaanissani aalajangerpaa.
