Præsidentinngorniunnissamut sassartitassamik Ohiomi qinersineq coronap ajornartoortitsinera pissutaalluni allakkatigut qinersisoqarpoq.Assi: Mandel Ngan/AFP/Ritzau Scanpix

Biden Ohiomi allakkatigut qinersinermi ajugaasoq

Joe Biden USA-mi nunap immikkoortuani Ohiomi coronavirusi pissutigalugu allakkatigut qinersinermi 70 procentinit amerlanerusunit taaguunneqarpoq.

USA-p præsidentimut tullersortigisimasaa Joe Biden, demokratineersoq, præsidentinngorniunnissamut sassartitassamik demokratit Ohiomi qinersineranni ajugaasutut nalunaarutigineqarpoq.

USA-mi nutaarsiassaqartitsivik NBC News taama allappoq.

Joe Biden 72 procentinit taaguunneqarpoq, Bernie Sanders 15 procentinit taaguunneqarluni.

Præsidentinngorniunnissamut sassartitassamik Ohiomi qinersineq coronap ajornartoortitsinera pissutaalluni allakkatigut qinersisoqarpoq.

AAMMA ATUARUK Bernie Sandersip Joe Biden præsidentimut qinersinissamut tapersersoraa

Inuit 1,5 millionit Ohiomi qinersiartorsimasut nutaarsiassaqartitsiviup AP-p allaaseraa, 2016-imi qinersinermut sanilliullugu ikinnerungaatsiarlutik, 3,2 millionimmi taamanikkut qinersiartorput.

Ohiomi marsip ulluisa 23-anni qinersisoqartussaagaluarpoq, coronalli ajornartoortitsinera pissutaalluni kinguartinneqarluni.

USA-mi præsidentimut ukioq manna novembarimi qinersisoqartussaavoq, qanorlu qinersisoqarnissaa Ohiomi ippassaq qinersinerup takutissinnaavaa.

Isummersuutit