USA-p illersornissamut ministeriata Trumpip sakkutuulersuinissamut siunnersuutaa tapersinngikkaa
USA-mi illoqarfinni assigiinngitsuni eqqissiviilliornerit unitsinniarlugit sakkutuulersuinissaq, USA-p præsidentiata Donald Trumpip siusinnerusukkut sioorasaarutigaa, USA-lli illersornissamut ministerianit Mark Esperimit tapersersorneqarnissani Trumpip naatsorsuutigissanngilaa.
USA-p illersornissamut ministeriata, Mark Esperip, præsidentip siunnersuutaa tapersersorsinnaanagu tusagassiortunik pingasunngornermi katersortitsinermi oqaatigaa.
- Nukinginnarluinnartunik allatigulluunniit ajornavissumik aatsaat pisoqarpat sakkutuulisoqartariaqarsinnaavoq, Mark Esper oqarpoq. CNN taama allappoq.
- Nukinginnarluinnartunik maanna pisoqanngilaq. Eqqissiviilliortoqartillugu inatsisip Insurrection Actip atorneqarnissaa tapersersunngilara, illersornissamut ministeri ilanngullugu oqarpoq.
AAMMA ATUARUK Trumpip akerliussutsimik takutitsisut sakkutuulersuunniarai
USA-mi illoqarfinni amerlasuuni sapaatit akunnerata kingulliup ingerlanerani akerliussutsimik takutitsisoqaqattaarpoq, eqqissiviilliortoqartarlunilu.
Donald Trumpillu sakkutuuliinissamik ataasinngormat sioorasaarivoq.
Sakkutuuliisoqassappat inatsit tassunga attuumassuseqartoq Insurrection Act, 1807-imeersoq, atorneqartariaqassaaq. Taartumik amilinnik malersuinerit akerliuffigalugit Los Angelesimi 1992-imi eqqissiviilliortoqangaatsiarmat Insurrection Act kingullermik atorneqarpoq.