Uranisiorniarunnaarneq: SIK pakatsisoq Sulisitsisut allanngujaassusermik kissaateqartut
Nunatsinni uranisiortoqarsinnaajunnaarpoq. Inatsisartut amerlanerussutillit ullumi taama aalajangerput. Sulinermik Inuussutissarsiuteqartut Kattuffiata ulloq nunatsinnut alianartutut taavaa.
- Ulloq manna isumaqarpunga nunatsinnut alianartuusoq, SIK-mi siulittaasoq, Jess G. Berthelsen oqarpoq.
Uranimik nunatsinni misissueqqaarneq, ujaasineq piiaanerlu inatsisitigut inerteqqutaalerpoq. Inatsisartunut ilaasortat amerlanerussutillit, Inuit Ataqatigiinneersut Naleqqameersullu taama taasipput.
AAMMA ATUARUK Urani naaggaaraat: Inatsisartuni akuersisut amerlanerussuteqaqqalaartut
Aalajangerneq Sulisitsisut peqatigiiffianni pisortap, Christian Keldsenip, tupaallaatiginngilaa.
- Tamanna ilimanaateqareerpoq. Immikkoortormi taanna Naalakkersuisoqatigiit naapeqatigiiffigisaraat. Taamaattumik akuersissutigineqarnera tupaallaatiginngilara, Christian Keldsen
SIK-p kattuffittut uranitalinnik aatsitassarsiortoqassasoq anguniarpaa. Tamanna ukiaq ataatsimeersuarneranni aalajangigaavoq. Taamaaliornikkut sulisartut aningaasaateqarnerulissasut siulittaasoq isumaqarpoq.
Siulittaasoq: Ilaasortagut aningaasaateqarnerulissanngillat
Inatsisip maanna akuerineqarnera sulisartut aningaasaateqarnerulernissaannut qanillattornerunngitsoq Jess G. Berthelsen isumaqarpoq.
SIK-p ilaasortamik ilaasa isumaqatigiissutaannik illua-tungiminnut, tassa Namminersorlutik Oqartussanut isumaqatigiinniangajalerpoq. Uranisiortoqarsinnaajunnaarmallu aningaasarsiat qaffannissaat naatsorsuutigineqanngilaq.
- Isumaqatigiinniangajalerpugut. Nalunngilluaasarpara piumasaqaatinik saqqummiussigutta taava Naalakkersuisut oqassapput: Akissaqanngilagut, Jess G. Berthelsen oqarpoq.
Sulisitsisut: Aqutsineq allanngoqattaassanngilaq
Inatsisartut urani pillugu inatsisaat qaqugumorsuaq atuutinngilaq. Inatsisartuni amerlanerussutillit qaquguluunniit inatsimmik atorunnaarsitsisinnaapput. Allanngorartoqannginnissaali Sulisitsisut, uranimut isummerusunngitsut, kissaatigaat.
- Naalakkersuinikkut allanngujaassuseq kissaatigaarput. Aalajangikkagut sinaakkutigullu piffissami piffissaanngitsukkullu eqqorneqassanngillat, suliffeqarfinnullu aningaasaliisunut Kalaallit Nunaannilu maanna sulianut nalornilersitsinatik, Christian Keldsen oqarpoq.
Inatsimmut Inuit Ataqatigiit Nalerarlu akuersipput, Siumut Demokraatillu itigartitsisut Atassut taaseqataanngilaq.
KNR-imit Kuannersuarni misissuinissamut akuersissutaatillit, Greenland Minerals, attaveqarfigigaluarpagut taakkuali saaffiginnissummut qisuarianngillat.