Urani pillugu nunat tamalaat isumasioqatigiinnissaannut Sara Olsvig peqataalersoq

Isumasioqatigiinnermi sammisassat uranip peqqinnissamut, avatangiisinut, ulluinnarnilu sakkussiornermut atorneqarneranut aalajangiiniarnernilu peqataanissamut pisinnaatitaaffeqarnermut tunngassasut, Inuit Ataqatigiit tusagassiorfinnut nalunaarummi allaaseraat.

Sara Olsvig, isumasioqatigiinnerup ulluini siullerni najukkami uranimik piiaanissamut pilersaarusiortoqartillugu innuttaasut qisuariaataat pillugu oqallinnermut peqataassaaq, Nunavummit, Afrikamit, USA-mit, Canadamilu nunap immikkoortuinit arlalinnit oqallinnermi peqataasoqassalluni.

AAMMA ATUARUK GME-p IA pakatsissutigigaa

Naaggaarnissamut pisinnaatitaaffeqarneq

Sara Olsvig isumasioqatigiinnerup ulluisa kingullianni oqalugiartut pingaarnerit ilaattut oqalugiassaaq, inuttut pisinnaatitaaffiit, nunallu inoqqaavisa pisinnaatitaaffii ulorianartunik qinngornertalinnik nunat tamalaat akornanni aallussinermi sammineqalerpata oqalugiassalluni:

- Inuit Ataqatigiinnit erseqqissumik uranimut polikkeqarpugut. Naaggaarpugut. Oqalugiarninni oqariartuutissara pingaarneq tassaassaaq naaggaarnissamut pisinnaatitaaffeqartugut. Aalajangigassat taama annertutigisut aalajangiiffigisassaatillugit tamat oqartussaaqataanerat pillugu naalakkersuinikkullu ingerlatsilluarnikkut imminut qaffasissunik piumasaqaateqartariaqarpugut. Tamanna qulakkiissallugu Nunatsinni suli suliassaqaqaagut, innuttaasullu aalajangiinernut peqataavitsinnissaannut suli aamma suliassaqarluta, aamma urani pineqartillugu, Inuit Ataqatigiit siulittaasuat Sara Olsvig oqarpoq.