Ingerlatseqatigiiffiup Greenland Mineralsip Kuannersuarni aatsitassanut qaqutigoortunut suliniutaanut nalunaarusiat, avatagiisinut innuttaasunullu sunniutissai pillugit Naalakkersuisuisut maanna tusarniutigaat.

Uranimulli akerliusut tamanna isoreqaat. Peqatigiiffik nunap inoqqaavisa pisinnaatitaaffii pillugit Naalagaaffiit Peqatigiit aalajangersagaat ILO 169 unioqqutinneqartoq tusarniaanerlu unitsinneqartariaqartoq isumaqarput.

AAMMA ATUARUK Naalakkersuisut aatsitassanik qaqutigoortunik Kuannersuarni suliniut tusarniaassutigigaat

- Artikel 7-imiittut, siullermiippoq angisuunik pilersaaruteqartoqartillugu inuit sumiiffiup qanigisaaniittut peqataatinneqarnissaat, taanna pisimanngilaq, Urani Naamik siulittaasua, Jan Rehtmar-Petersen, KNR-mut oqarpoq, unioqqutinneqartutullu isumaqarfigisartik alla innersuussutigalugu.

- Artikel 15-imi allaqqavoq, aatsitassarsiortoqarniartillugu misissueqqaarnerit tusarniaanerillu pinnginnerini ornilluta ernummatitsinnik paasiniaavigisussaavaatigut, taakkulu aallaavigalugit misissuititsillutik. Taakku pisimanngitsutut isumaqarfigaagut.

Naalakkersuisut tikeraartartut

Naalakkersuisut siulittaasuat, Kim Kielsen, ukioq manna juunip qaamataani kujataaniippoq. Tassanilu Urani Naamik piffissaq kingullerpaaq atorlugu ataatsimeeqatiserineqartut siulittaasoq isumaqarpoq.

- Ataatsimeeqatigereerluta aallaraangamik tutsaqaqqinneq ajorput. Aamma Jens-Frederik Nielsen septembarimi maaniikkami taamaappoq. Ernummatigut apuuppagut kisianni qanoq iliuuseqarfiginiarneqarneri tusarfigeqqinneq ajorpagut, Jan Rehtmar-Petersen oqarpoq.

Suliniut 2014-imi tusarniutigineqaqqaarpoq, tassanilu soqutigisallit isummersorsinnaallutik. Jan Rehtmar-Petersen taamani peqataavoq.

AAMMA ATUARUK Borgmesterip tullersortaa aatsitassarsiornissamut suliniut pillugu: Malinnaanissaq pissannganarsivoq

Naalakkersuisut aalajangersagaq peqatigiiffimmit atuutinnginnerarneqartoq suliniummi atuuttoq, Inatsisartunut ilaasortap, Marianne Paviassenip, Inuit Ataqatigiinneersup, Naalakkersuisunut apeqqutaanut akipput.

- Namminersorlutik Oqartussat 2009-mi eqqunneqarnerat nunap inoqqaavisa pisinnaatitaaffiinik atortussanngortitsinerusoq Naalakkersuisut isumaqarput, soorlu ILO nr. 169-imi aamma nunap inoqqaavisa pisinnaatitaaffii pillugit Naalagaaffiit Peqatigiit Nalunaarutaanni atuarneqarsinnaasut, nunanut allanut tunngasunut naalakkersuisoq, Steen Lynge akivoq.

Nielsen: Alloriarneq pingaarutilik

Kuannersuit Narsamiit kilometerit qulit inorlugit inissisimavoq. Tassani aatsitassanik qaqutigoortunik aamma uranitalinnik aatsitassaqarpoq. Tamakkua ilaatigut atomip nukinganik nukissiusiornermut atorneqartarput.

Naalakkersuiut tusarniaanertik tallimanngormat aallartippaat. Tamanna aatsitassanut naalakkersuisup, Jens-Frederik Nielsenip nuannaarutigaa.

AAMMA ATUARUK Naalakkersuisoq aatsitassarsiulersaarnerit pillugit: Itigartitsinissatsinnut piareersimavugut

- Tamanut ammasumik tusarniaaneq Kalaallit Nunaannut tamarmut alloriarneruvoq pingaarutilik sivisuumik utaqqineqartoq, naalakkersuisoq tusagassiortunut nalunaarummi allappoq.